ასლან ბჟანია ბაშარ ასადს შეხვდება - რა მიზნით ჩავიდა აფხაზეთის დე ფაქტო რესპუბლიკის "მთავრობის დელეგაცია" სირიაში

დე ფაქტო აფხაზეთის ე.წ. პრეზიდენტი, ასლან ბჟანია "ოფიციალურ ვიზიტით“ სირიაში იმყოფება. ინფორმაციას ამის შესახებ ბჟანიას "ადმინისტრაცია“ ავრცელებს.

დამასკოს საერთაშორისო აეროპორტში ასლან ბჟანიას სირიის ტრანსპორტის მინისტრი, ზუჰეირ ხაზიმი, საგარეო საქმეთა მინისტრის მოადგილე აიმან სუზანი და სირიის მთავრობის სხვა წარმომადგენლები დახვდნენ.

ასლან ბჟანიას პრესსამსახურის განცხადებიდან ირკვევა, რომ აფხაზეთის დე ფაქტო რესპუბლიკის დელეგაციის შემადგენლობაშია აფხაზეთის ე.წ. პარლამენტის სპიკერი ვალერი ქვარჩია, "პრეზიდენტის ადმინისტრაციის ხელმძღვანელი", ალჰას კვიცინია, პირველი "ვიცე-პრემიერი“ და "სოფლის მეურეობის მინისტრი“ ბესლან ჯოპუა და ე.წ. მთავრობის სხვა წარმომადგენლები.

"ოფიციალური შეხვედრები“ დღეს დაიწყება. დაგეგმილია ბჟანიასა და სირიის პრეზიდენტის, ბაშარ ალ ასადის შეხვედრა, ასევე გაიმართება "აფხაზეთ-სირიის მთავრობათაშორისი კომისიის პირველი სხდომა“.

გარდა ამისა, დე ფაქტო აფხაზეთის ე.წ. პრეზიდენტის პრესსამსახური იუწყება, რომ ასლან ბჟანია სირიაში აფხაზურ დიასპორასაც შეხვდება.

ცნობისთვის, სირიამ 2018 წელს აფხაზეთის "დამოუკიდებლობა“ აღიარა.