"ჩამოდიოდაო, შეეშინდაო ხანძარი რომ დაინახა... ჟალუზებს მოყვებოდაო და ჩამოვარდა" - რას ყვებიან პეკინზე, კორპუსში გაჩენილი ხანძრის შესახებ მოქალაქეები

ქალი, რომელიც პეკინზე მდებარე საერთო საცხოვრებლის მე-5 სართულიდან ხანძრის დროს გადმოვარდა, საავადმყოფოში გარდაიცვალა. ამის შესახებ ინფორმაცია "ინტერპრესნიუსს“ ხეჩინაშვილის სახელობის კლინიკაში დაუდასტურეს.

კლინიკაში დეტალებთან დაკავშირებით არ საუბრობენ.

კორპუსის მაცხოვრებლები "ფორმულასთან" მომხდარის შესახებ საუბრობენ:

• “ახლაც არ ვარ აზრზე რა მოხდა და როგორ იყო. სახანძრო გამოვიძახე, მაგრამ რა ვუშველე, ვერაფერი ვერ ვუშველე. საიდან გადმოვარდა, როგორ გადმოვარდა, არ ვიცი“
• "ჩვენ გვეძინა და ხალხი რომ აყვირდა, ხანძარია და გარეთ გამოდითო, მაგ დროს გავიგეთ და ჩამოვედით. ჩვენც აქ გავიგეთ, რომ ამბობდნენ. სანამ ჩვენ ჩამოვედით, მანამდეა ჩამომხტარი. სავარაუდოდ. ჩამოდიოდაო, შეეშინდაო ხანძარი რომ დაინახა და ჟალუზებს მოყვებოდაო და ჩამოვარდა", - ყვებიან იქ მცხოვრები ადამიანები.

ცნობისთვის, შემთხვევა დღეს დილით მოხდა. პეკინის გამზირზე, საერთო საცხოვრებელში ხანძარი გაჩნდა, რომელიც ამ დროისთვის ლიკვიდირებულია.

"პეკინის გამზირზე ხანძარი ლიკვიდირებულია. ხანძარი გაჩნდა მეხუთე სართულზე, იწვოდა დაახლოებით 300 კვადრატული მეტრი ფართი, მეხუთე, მეექვსე და მეშვიდე სართულებზე. ადგილზე ოპერატიულად იქნა მობილიზებული 14 სახანძრო-ავტოცისტერნა. იყო ხანძრის გავრცელების საფრთხე, თუმცა ოპერატიული რეაგირების შედეგად მოხდა ხანძრის ლოკალიზება", - ამბობს საგანგებო სიტუაციების მართვის სამსახურის თბილისის მთავარი სამმართველოს უფროსი ოთარ კერესელიძე.