"ალბანეთში ჩასვლის დღიდან თავს საერთაშორისო დონის ვარსკვლავად ვგრძნობ" - ნუცა ბუზალაძე "Magic Song 2021"-ის გამარჯვებული გახდა

მომღერალი ნუცა ბუზალაძე ალბანეთში საერთაშორისო ფესტივალის - "Magic Song 2021"-ის გამარჯვებული გახდა. ფესტივალი ორ კატეგორიად იყოფა - "დიდი და პატარა ვარსკვლავები", ნუცამ დიდების კატეგორია მოიგო, რომლის შესახებ პოსტი, სოციალურ ქსელში გამოაქვეყნა.

გამარჯვებამდე ცოტა ხნით ადრე, ნუცა AMBEBI.ge-ს ფესტივალის შესახებ ესაუბრა:

"ახლა ვარ ალბანეთში, ერთ-ერთ ყველაზე დიდ ფესტივალზე "Magic Song 2021". ხარისხით დაახლოებით "ევროვიზიის" მსგავსია. ძალიან პროფესიონალური გუნდი მუშაობს. უმაღლესი ხარისხის გადაღებები აქვთ, ფაქტობრივად, ჩემს სიმღერაზე კლიპი გადაიღეს. ისე დამხვდნენ, ისეთი გადაცემები მომიძღვნეს და იმდენად საუკეთესოდ იმუშავა ამ ჯგუფმა ჩემს გამოსვლაზე, რომ ალბანეთში ჩასვლის დღიდან თავს საერთაშორისო დონის ვარსკვლავად ვგრძნობ. გამოსვლა მექნება ერთ კვირაში. ფესტივალზე გავიტანე მიშო სულუხიას უძლიერესი სიმღერა, რომელიც დაწერისთანავე მე მაჩუქა და მითხრა, რომ ამ სიმღერას შენს მეტი ვერავინ იმღერებსო.

ამ ფესტივალის პლიუსი არის ის, რომ დიდი და პატარა ვარსკვლავების ფესტივალი ცალ-ცალკე არის, მე დიდი ვარსკვლავების კატეგორიაში გამოვედი. უკვე გავიცანი ალბანეთში ნომერ პირველი პროდიუსერი, რომელმაც შექმნა ეს ფესტივალი, ასევე ალბანეთში ყველაზე ცნობილი მომღერალი, რომელსაც სულ ჰიტები აქვს და ამ მომღერალთან ერთადაც იგეგმება ჩემი ჰიტების ჩაწერა."