პუტინისა და ლუკაშენკოს გასეირნება შავ ზღვაში - სოჭში გამართული შეხვედრის დეტალები და არაფორმალურ გარემოში გადაღებული ფოტოები

29 მაისს რუსეთის პრეზიდენტ ვლადიმერ პუტინსა და ბელარუსის პრეზიდენტ ალექსანდრე ლუკაშენკოს შორის სოჭში პირისპირ შეხვედრა გაიმართა. შეხვედრისას ბელარუსის პრეზიდენტმა განაცხადა, რომ გარედან არის მცდელობები ქვეყანაში სიტუაცია შეარყიონ ისე, როგორც 2020 წლის აგვისტოში იყო.

"არის მცდელობა სიტუაცია შეარყიონ გასული წლის აგვისტოს დონეზე. გასაგებია, რა სურთ ამ დასავლელ მეგობრებს ჩვენგან. რა არის აქ განსახილველი“, - აღნიშნა ლუკაშენკომ. რუსული მედიის ინფორმაციით, ბელარუსის პრეზიდენტმა განაცხადა, რომ მან თავის რუს კოლეგასთან შეხვედრაზე მიიტანა დოკუმენტები, რომლებიც გაარკვევს სიტუაციას Ryanair–ის თვითმფრინავის დასმასთან დაკავშირებით.

"ყოველთვის არიან ჩვენთვის პრობლემების შექმნის მოსურნეები. თქვენ ამის შესახებ იცით და მე თქვენ მოგაწვდით ინფორმაციას. თქვენთან ისეთი სანდო ურთიერთობები მაქვს, თან მოვიტანე რამდენიმე დოკუმენტი, რომლებსაც გიჩვენებთ, რათა მიხვდეთ, თუ რა ხდება. რათა მიხვდეთ, თუ რა ხალხია ისინი. ჩამოტანილი დოკუმენტების გაცნობის შემდეგ გაირკვევა, "რა ხდება და რა მოხდა იქ“, - აღნიშნა ლუკაშენკომ პუტინთან შეხვედრისას.

თავის მხრივ, პუტინმა გაიხსენა, რომ 2013 წელს ბოლივიის პრეზიდენტის ევო მორალესის თვითმფრინავი ვენაში შემოწმებისთვის დასვეს და პრეზიდენტი თვითმფრინავიდან ჩამოსვეს და ამას არაფერი მოჰყოლია. ლუკაშენკომ კი კიდევ ერთი მსგავსი ინციდენტი გაიხსენა.

გარდა ამისა, გაირკვა, რომ რუსეთი ბელარუსს კრედიტის სახით 500 მილიონ დოლარს გამოუყოფს, რომელსაც ქვეყანა ივნისში მიიღებს. ამის შესახებ კრემლის პრეს-მდივანმა დიმიტრი პესკოვმა განაცხადა.

მისი თქმით, რუსეთის პრეზიდენტ ვლადიმერ პუტინსა და მის ბელარუს კოლეგა ალექსანდრე ლუკაშენკოს შორის გამართული საუბრის ერთ-ერთი მთავარი თემა სწორედ ფინანსური დახმარების გამოყოფა იყო.

ლუკაშენკომ და პუტინმა სოჭში, შავ ზღვაში ნავითაც გაისეირნეს: