ტანზანიაში დეპუტატი ქალი ვიწრო შარვლის ჩაცმის გამო სხდომიდან გააძევეს - "შესაბამისად ჩაიცვით და შემდეგ დაბრუნდით“

ტანზანიაში ქალი დეპუტატები ბოდიშის მოხდას ითხოვენ პარლამენტის სპიკერისგან და იმ წევრისგან, რომლის მოთხოვნის საფუძველზეც, ვიწრო შარვლის ჩაცმისთვის ქალ პარლამენტარს სხდომა დაატოვებინეს.

ამბავი კი ასეთი იყო - მამაკაცმა დეპუტატმა სხდომაზე საჯაროდ განაცხადა, რომ ზოგიერთი ქალი პარლამენტში შეუფერებლად იცვამს.

"ბატონო სპიკერო, შეხედეთ მას ყვითელ პერანგში, შეხედეთ მის შარვალს“, - მიმართა დეპუტატმა პარლამენტის სპიკერს, რის შემდეგაც შარვალში გამოწყობილ ქალ პარლამენტარს უბრძანეს, წასულიყო და მას შემდეგ დაბრუნებულიყო, რაც შესაბამისად ჩაიცვამდა.

"წადით, ჩაიცვით შესაბამისად და შემდეგ დაბრუნდით“, - ასე მიმართა სპიკერმა ჯონ ნდუგაიმ დეპუტატ ქალს. მანვე დაამატა, რომ ეს არ იყო პირველი საჩივარი, რომელიც პარლამენტარი ქალების ჩაცმულობასთან დაკავშირებით მიიღო და დაცვას უბრძანა, რომ პარლამენტში "შეუსაბამოდ ჩაცმულები" არ დაუშვან.

ტანზანიაში პარლამენტარ ქალებს შარვლის ჩაცმის უფლება აქვთ, თუმცა, პარლამენტის სპიკერი ამბობს, რომ შარვალი არ უნდა იყოს ტანზე მჭიდროდ მომდგარი, არ უნდა იყოს ვიწრო.

ქალი დეპუტატების - ჟაკლინ ნგოიანისა და სტელა მანიანიას ხელმძღვანელობით შექმნილ ჯგუფში აცხადებენ, რომ მსგავსი ქმედება იყო უსამართლო და გაძევებული დეპუტატის შარვალი აკმაყოფილებდა არსებულ სტანდარტებს.

წყარო: BBC.com