ავტორი:

მეუფე ნიკოლოზი კითხვაზე, ერევა თუ არა ეკლესია არჩევნებში - "რა თქმა უნდა, ერევა, მითხარით, როგორ გავაკეთო, რომ არ ჩავერიო და არ ჩავერევი"

მეუფე ნიკოლოზი კითხვაზე, ერევა თუ არა ეკლესია არჩევნებში - "რა თქმა უნდა, ერევა, მითხარით, როგორ გავაკეთო, რომ არ ჩავერიო და არ ჩავერევი"

"ძალიან დაუცველად ვგრძნობ თავს სახელმწიფოში, რომელსაც ჩემი ეშინია", - ამის შესახებ ახალქალაქისა და კუმურდოს მიტროპოლიტმა მეუფე ნიკოლოზმა "პალიტრანიუსის“ გადაცემაში "პოლიტ - ქალაქი“ განაცხადა.

როგორც მეუფე ნიკოლოზი ამბობს, მთავრობის პრობლემაა, თუ სასულიერო პირების ეშინია.

"თუ შსს-ს, ან მთავრობას ჩემი, სასულიერო პირის ეშინია, რომ მე გავლენას მოვახდენ, ცუდია, იმათი პრობლემაა. ვცხოვრობ ამ სახელმწიფოში, სახელმწიფოს მოქალაქე ვარ, მინდა გითხრათ, რომ ძალიან დაუცველად ვგრძნობ თავს ასეთ სახელმწიფოში, რომელსაც ჩემი ეშინია. ყველაზე უფრო მეშინია იმ ადამიანების, ვისაც ჩემი ეშინიათ, რადგან მე არ ვარ საშიში“, - განაცხადა მეუფე ნიკოლოზმა.

მან ასევე უპასუხა კითხვას, ერევა თუ არა ეკლესია საერო საქმეებში და პოლიტიკაში.

"თქვენ ახლა ისეთ კითხვას მისვამთ, რომ ამ კითხვაზე პასუხით ჩავერევი პოლიტიკაში, ჩავერევი ეკლესიის და სახელმწიფოს ურთიერთობაში. მიუხედავად ამისა, რაც არ უნდა გიპასუხოთ. რა თქმა უნდა, ერევა, რადგან შეუძლებელია, შეუძლებელია, რომ არ ჩაერიოს. ახლა გავჩუმდე ან რაღაცა გითხრათ, ისევ პოლიტიკაში ჩარევაა, მე რომ განცხადება გავაკეთო“, - განაცხადა მეუფე ნიკოლოზმა.

მისივე თქმით, სინოდის ერთ-ერთ სხდომაზე მღვდელმთავრები შეთანხმდნენ, რომ არ უნდა აკეთონ პოლიტიკური შინაარსის განცხადებები და კონკრეტულ პოლიტიკურ პროცესებში არ უნდა ჩაერიონ.

"ჩვენ ყველამ ამ ოქმს ხელი მოვაწერეთ. ანუ, ეს არის ეკლესიის საერთო პოზიცია. რაც შეეხება კონკრეტული პიროვნებების მიერ სხვადასხვა ხარისხის გადაცდომებს, რომელიც ხდება ეკლესიაშიც, რადგან ადამიანები ვართ, ხდება ერშიც, პოლიტიკაშიც, თქვენ სფეროშიც. ეს არის დარღვევები, რომელზეც შესაბამისი რეაგირება უნდა არსებობდეს“, - განაცხადა მეუფე ნიკოლოზმა და დასძინა, რომ მისი ოცნებაა, იცხოვროს სამართლებრივ სახელმწიფოში.

კითხვაზე, ერევა თუ არა არჩევნებში ეკლესია, მეუფე ნიკოლოზმა განაცხადა:

"რა თქმა უნდა, ერევა, რათ უნდა ამას ლაპარაკი. მითხარით, როგორ გავაკეთო, არ ჩავერიო და არ ჩავერევი, როგორც ვქნა ეს. ჩემი მრევლი მეკითხება აზრს, ვის მივცემ ხმას, არ ვეუბნები. ყველა ხედავს რა ურთიერთობა მაქვს ხელისუფლებასთან, ცალკეულ პარტიებთან“, - განაცხადა მეუფე ნიკოლოზმა.

რამდენი ადამიანია ვაქცინის ორივე დოზით აცრილი და რამდენი ინფიცირებული გადის მკურნალობას კლინიკაში - თამარ გაბუნია უახლესი მონაცემებით

მასწავლებელთა აღიარების რეგიონალური კონკურსი საუკეთესო პედაგოგებს გამოავლენს

ინფიცირების 1 023 ახალი შემთხვევა და 17 გარდაცვლილი - რამდენი ტესტი ჩატარდა ბოლო 24 საათში და როგორია შედეგები რეგიონების მიხედვით