"არასოდეს დავნებდები, ახლა თავს უკეთ ვგრძნობ" - კრისტიან ერიქსენის პირველი კომენტარი მოედანზე მომხდარი დრამატული შემთხვევის შემდეგ

დანიელი ფეხბურთელის, კრისტიან ერიქსენის პირველ კომენტარს, მოედანზე ცუდად გახდომის შემდეგ, Gazzetta dello Sport აქვეყნებს. გამოცემას კრისტიანის კომენტარი მისმა აგენტმა მიაწოდა.

ფეხბურთელი ამბობს, რომ ის თავს კარგად გრძნობს და რომ "არასოდეს დანებდება". ერიქსენი ასევე მადლობას უხდის გულშემატკივარს მხარდაჭერისთვის და ამბობს, რომ ახლა მისი ყურადღება მიმართულია იმისკენ, რომ გამოიკვლიონ, რამ გამოიწვია მოულოდნელად ამგვარ მდგომარეობაში ჩავარდნა.

"მადლობა, მე არასოდეს დავნებდები. ახლა თავს უკეთ ვგრძნობ, მაგრამ მსურს გავიგო, რა მოხდა. მინდა მადლობა გითხრათ ყველას იმისთვის, რაც ჩემთვის გააკეთეთ“, - ამბობს კრისტიანი.

ის ასევე ესაუბრა ვიდეოზარით თავის თანაგუნდელებს - "მგონი, თქვენ ჩემზე უფრო ცუდად გახდით“, - ეხუმრა ფეხბურთელი მეგობრებს.

ერიქსენი ამ დრომდე კოპენჰაგენის კლინიკაში რჩება და გამოკვლევებს იტარებს. მის გვერდით არიან მშობლები და ცოლი.

შეგახსენებთ რომ ევრო 2020-ზე, ფინეთისა და დანიის საფეხბურთო დაპირისპირების დროს, დანიელი ნახევარმცველი, კრისტიან ერიქსენი მოულოდნელად ცუდად გახდა, ის მინდორზე წაიქცა და 13 წუთის განმავლობაში უგონო მდგომარეობაში იყო.

მოგვიანებით ფეხბურთელი კლინიკაში გადაიყვანეს. კრისტიანის ექიმმა დაადასტურა, რომ მას მოედანზე გული გაუჩერდა, თუმცა სწრაფი რეაგირების შედეგად და დეფიბრილატორის გამოყენებით, გული აუმუშავეს. ამ დროისთვის ფეხბურთელის მდგომარეობას ექიმები სტაბილურს უწოდებენ, ჯერჯერობით უცნობია თუ რამ გამოიწვია მისი ცუდად გახდომა.

წყარო: დეილი მეილი

შენიშვნა: მთავარი ფოტო არ არის ახალი. სურათი აღებულია ფეხბურთელის ინსტაგრამ გვერდიდან