ავტორი:

გოგი წულაიამ საპატიმროში 25 კგ დაიკლო - "გადავწყვიტე, მეცოცხლა"

გოგი წულაიამ საპატიმროში 25 კგ დაიკლო - "გადავწყვიტე, მეცოცხლა"

"ახალი ქრისტიან-დემოკრატების" თავმჯდომარემ, ოპოზიციონერმა პოლიტიკოსმა გოგი წულაიამ საპატიმრო დატოვა. როგორც წულაიამ განაცხადა, მან პატიმრობის დროს 25 კგ დაიკლო.

"25 კილო დავიკელი. პირველად 14 დღე ვიშიმშილე, შემდეგ შევწყვიტე და 7 დღე ვიშიმშილე. შემდეგ წავიკითხე ნაპოლეონი, სადაც წერს "ჩემი დაცემის დროს ბედისწერა მეუბნებოდა მოკვდიო, მაგრამ ღირსება მეუბნებოდა იცოცხლეო“, - გადავწყვიტე მეცოცხლა“, - აღნიშნავს გოგი წულაია და აცხადებს, რომ მას ძალადობა დააბრალეს.

შეგახსენებთ, რომ დღეს გამართულ სასამართლო პროცესზე მოსამართლემ გოგი წულაიას ადვოკატის შუამდგომლობა დააკმაყოფილა და მას 6 000-ლარიანი გირაო შეუფარდა.

"იმის განცდა გამიჩნდა, რომ ამ სასამართლოშიც არსებობენ ადამიანები, რომლებიც მონა არ არიან და თავისუფალ გადაწყვეტილებას ღებულობენ. ეს არის ძალიან კარგი განცდა. მადლობა მინდა ვუთხრა იმ პატიმრებს, რომლებიც სოლიდარობას მიცხადებდნენ და მამხნევებდნენ. ბარე ორი პოლიტიკოსისგან განსხვავებით, საერთოდ რომ არ ვუხსენებივარ სხვათაშორის, ცოტა წყენაც მაქვს გულში. ვიცი, რომ შალვა ნათელაშვილი, ნინო ბურჯანაძე და ლაშა ჩხარტიშვილი მიცხადებდნენ მხარდაჭერას, დანარჩენებს მაინც და მაინც თავი არ მოუკლავთ. თუ ისინი ფიქრობენ, ამ ხელისუფლებამ იმიტომ დამიჭირა, რომ ქალის უფლებების ნამეტანი დაცვა უნდათ და ასმათზე იყვნენ გადარეულები, ძალიან შემცდარან. მე ვიყავი პოლიტიკური პატიმარი, დამიჭირეს ბერას გინებისთვის“, - განაცხადა საპატიმროს დატოვების შემდეგ წულაიამ.

ცნობისთვის, მას ბრალი სისხლის სამართლის კოდექსის 138-ე მუხლით აქვს წარდგენილი, რაც სექსუალური ხასიათის სხვაგვარ ძალადობას გულისხმობს. სამართალდამცავებმა წულაია 19 მარტს დააკავეს. თავდაპირველად, გამოძიება სისხლის სამართლის კოდექსის 126-ე მუხლით მიმდინარეობდა, რაც ძალადობას გულისხმობს. გამოძიების ინფორმაციით, წულაიამ ნაქირავებ ბინაში ნაცნობ ქალზე იძალადა.