"შეიძლება იყოს მსხვერპლი" - რას აცხადებენ "თბილისი პრაიდის" მოწინააღმდეგეები, რომლებმაც ღამე რუსთაველის მეტროსთან, კარვებში გაათენეს

"თბილისი პრაიდის" მოწინააღმდეეგეების ნაწილმა ღამე რუსთაველი მეტროსთან გაათენა. მათ შორის იყვნენ "ბავშვთა უფლებების დაცვის საზოგადოებისა" და პარტია "ქართული იდეის" წარმომადგენლები.

პრაიდის მოწინააღმდეგეებმა რუსთაველის მეტროს მიმდებარე ტერიტორიაზე კარვები გაშალეს. როგორც აქციის მონაწილეები აცხადებენ, ისინი "თბილისი პრაიდის" ჩატარებას არ დაუშვებენ და ყველანაირი გზით შეეცდებიან მის ჩაშლას.

"ბავშვთა უფლებების დაცვის საზოგადოების" თავმჯდომარე გურამ ფალავანდიშვილი ამბობს, რომ "შეიძლება იყოს მსხვერპლი."

"შეიძლება იყოს მსხვერპლი, კიდევ ერთხელ ვაანონსებ, თუ მთავრობა მაინც გამოიყვანს ამ გაუგონარ მოძალადეებს, რადგან თქვენ იცით, რომ მთელი საქართველო ჩამოდის აქ.

ჩვენ მიგვატოვა მთავრობამ, ჩვენ დაგვიპირისპირდა მსოფლიო და ქართული პოლიცია უზნეობის მქადაგებლებს გაეფინა ფეხქვეშ," - განაცხადა გურამ ფალავანდიშვილმა. ფალავანდიშვილის კომენტარს "რუსთავი 2" ავრცელებს.

შეგახსენებთ, რომ “თბილისი პრაიდის” კვირეული 1-ელ ივლისს გაიხსნა, 5 ივლისს კი "თბილისი პრაიდი" "ღირსების მარშს" გამართავს. "ღირსების მარშის" სლოგანი "გამოდი სოლიდარობისთვის" იქნება.