რუსეთში გაუჩინარდა სამგზავრო თვითმფრინავი, რომელშიც 28 ადამიანი იმყოფებოდა - რა ინფორმაცია ვრცელდება მედიაში

რუსეთის აღმოსავლეთით რადარებიდან გაუჩინარდა სამგზავრო თვითმფრინავი, რომელშიც 28 ადამიანი იმყოფებოდა. ინფორმაციას ადგილობრივი ხელისუფლება ადასტურებს. თვითმფრინავი პეტროპავლოვსკ-კამჩატსკიდან პალანასკენ მიემართებოდა.

გავრცელებული ინფორმაციით, Ан-26-ის ტიპის სამგზავრო თვითმფრინავი ზღვაში ჩავარდა. აღნიშნული მოსაზრების არსებობის საფუძველს იძლევა ის ფაქტი, რომ მიღებულია შავი ყუთიდან სუსტი სიგნალი.

ოფიციალური ინფორმაციით, თვითმფრინავში მყოფი 28 პირიდან 22 მგზავრი იყო, მათ შორის ერთი - ბავშვი, დანარჩენები კი ეკიპაჟის წევრები.

დაუდასტურებელი ინფორმაციით, თვითმფრინავში იმყოფებოდა პალანას ადმინისტრაციული ერთეულის ხელმძღვანელი ოლგა მოხირევა. საგანგებო სიტუაციების სამსახურების ცნობით, შესაძლოა, თვითმფრინავი ზღვაში ჩავარდნილიყო.

ამ დროისთვის სამძებრო სამუშაოები მიმდინარეობს.

წყარო: BBC.com