"პოსტ-ფაქტუმ თავში ხელის შემორტყმა, რომ "უიმე, რატომ ძალადობს ხალხი?!", ყალბი პათეტიკაა" - "თბილისი პრაიდის" ორგანიზატორი

ყველაფერი, რაც გუშინ ვნახეთ, არ შეიძლება მისაღები იყოს, ამიტომ საზოგადოებამ, მედიამ და ყველა ჯგუფმა უნდა მივაწვდინოთ ხმა ადამიანებს, რომ გვინდა მშვიდობიან, სოლიდარულ, ემპათიურ და ისეთ საზოგადოებაში ცხოვრება, სადაც ადამიანის უფლებებს ფეხქვეშ არ გათელავენ, - ამის შესახებ „თბილისი პრაიდის“ ორგანიზატორმა გიორგი თაბაგარმა ჟურნალისტებს განუცხადა.

როგორც თაბაგარმა აღნიშნა, გუშინდელი ძალადობა ხელისუფლებამ დაუშვა.

„მშვიდობიანად შედგება ეს აქცია. იმათ რაც უნდათ, ის გააკეთონ. მოქალაქეებისთვის მთავარი სათქმელი ალბათ, ის მექნება, რომ ყველაფერი, რაც გუშინ ვნახეთ, არ შეიძლება მისაღები იყოს, არ შეიძლება ჟურნალისტებზე, აქტივისტებზე, ადამიანებზე ძალადობა იყოს მისაღები ფორმა ამ ქვეყანაში. ამიტომ ბევრი ადამიანის გამოსვლით, საზოგადოებამ, მედიამ და ყველა ჯგუფმა უნდა მივაწვდინოთ ხმა ადამიანებს, რომ გვინდა მშვიდობიან, სოლიდარულ, ემპათიურ და ისეთ საზოგადოებაში ცხოვრება, სადაც ადამიანის უფლებებს ფეხქვეშ არ გათელავენ.

რაც შეეხება ოფისში შეჭრას, გვიკავშირდებოდნენ პოლიციიდან ამ საქმესთან დაკავშირებით. ვიცით, რომ მოკვლევა დაიწყო, უნდოდათ ოფისის სივრცის ნახვა. იდენტიფიცირებადია ის ხალხი, ვინც ოფისს თავს დაესხა. ჩვენც გვქონდა კამერები, რომელიც ამ ყველაფერს იღებდა. პოლიციას რომ უნდოდეს ამ ადამიანებისთვის პასუხის გაცემა, გუშინვე, იქვე გასცემდა პასუხს და ეს პოსტ-ფაქტუმ თავში ხელის შემორტყმა, რომ „უიმე, რატომ ძალადობს ხალხი?!“, ყალბი პათეტიკაა და არაფერი აქვს საერთო გულწრფელ წუხილთან. გუშინ იძალადეს იმიტომ, რომ ხელისუფლებამ ეს დაუშვა. კოორდინირებულად იმოქმედეს, რომ როგორც მედია, ასევე ლიბერალურად განწყობილი ჯგუფები შეევიწროვებინათ“, - განაცხადა თაბაგარმა.