"ტკივილი ჰქონდა ძლიერი, სახის ძვლები ჰქონდა ჩამტვრეული" - ნოდარ მელაძე გარდაცვლილ ოპერატორთან ბოლო შეხვედრას იხსენებს

"ტვ პირველის" საინფორმაციო სამსახურის უფროსი ნოდარ მელაძე გარდაცვლილ ოპერატორთან, ლექსო ლაშქარავასთან ბოლო შეხვედრას იხსენებს.

"დღეს არის ძალიან მძიმე დღე ჩვენთვის. ლექსო იყო ჩვენი გუნდიდან ერთ-ერთი ყველაზე სასტიკად ნაცემი. კლინიკიდან გამოწერის შემდეგ, ბოლოს, პარასკევს ვნახე. ტკივილები ჰქონდა ძლიერი, იმიტომ რომ სახის ძვლები ჰქონდა ჩამტვრეული.

დედა როგორც ჰყვება, გუშინ საღამოს დაბრუნდა სახლში, ჩვეულებრივად დაიძინაო, არაფერი განსაკუთრებული არ ჰქონდაო. დღეს დილით შევიდა დედა, რომ ეთხოვა ძაღლის გასეირნება და ლექსო იყო უკვე გარდაცვლილი," - განაცხადა ნოდარ მელაძემ.

"ტვ პირველის" ოპერატორი ლექსო ლაშქარავა, რომელიც 5 ივლისის აქციაზე "თბილისი პრაიდის" მოწინააღმდეგე ძალადობრივი ჯგუფების თავდასხმის მსხვერპლი გახდა, დღეს დილით საკუთარმა დედამ საწოლში გარდაცვლილი იპოვა. გარდაცვალების მიზეზის დადგენაზე ექსპერტიზა უკვე მუშაობს.

ლექსო ლაშქარავას გარდაცვალების ფაქტზე გამოძიება საქართველოს სისხლის სამართლის კოდექსის 115 მუხლით დაიწყო.

შსს-ს ინფორმაციით, მიმდინარე წლის 5 ივლისს, თბილისი პრაიდის წინააღმდეგ გამართული აქციის გაშუქების დროს, ინგოროყვას ქუჩაზე მდებარე ორგანიზაცია „სირცხვილიას“ ოფისში, ტელეკომპანია „ტვ 1“-ის ჟურნალისტსა და ოპერატორს, ალექსანდრე ლაშქარავას სამსახურებრივი მოვალეობის შესრულებისას ფიზიკური და სიტყვიერი შეურაცხყოფა მიაყენეს. ჟურნალისტის პროფესიულ საქმიანობაში ძალადობის მუქარით უკანონოდ ხელის შეშლის, ძალადობითა და ძალადობის მუქარით დევნის, ჯგუფური ძალადობის ფაქტებზე გამოძიება მიმდინარეობს და დაკავებულია 4 პირი.