"რატომ ევროკავშირი? აი, რაში იხარჯება რიგითი ევროპელების ფული საქართველოში..." - რას წერს "მოძრაობა თავისუფლებისთვის" წევრი

ორგანიზაცია "მოძრაობა თავისუფლებისთვის" წევრი გიორგი ჟღენტი სოციალურ ქსელში პოსტს აქვეყნებს, სადაც განმარტავს საკუთარ მოსაზრებას, თუ რატომ უნდა აირჩიოს საქართველომ ევროპა და ევროპული ღირებულებები.

"2021 წლის სახელმწიფო ბიუჯეტში განსაზღვრულია 287 მილიონი ლარის ოდენობის გრანტი, მათგან უმეტესი სწორედ ევროკავშირიდან მოდის.

ბოლო პერიოდში რუსულმა პროპაგანდამ მოახერხა და ისე წარმოაჩინა ყველაფერი, რომ ევროკავშირი, თითქოს, მხოლოდ LGBTQ+ თემს ეხმარება და ქართველების გარყვნაში დებს ინვესტიციას. თუმცა, რეალობა სულ სხვაგვარია.

აი, რაში იხარჯება რიგითი ევროპელების ფული:

• აჭარის სოფლების წყალმომარაგების პროგრამა (EU, KFW) - 12.3 მილიონი ლარი.
• ქუთაისის მყარი ნარჩენების ინტეგრირებული მართვის პროექტი (EU, KfW) - 1.4 მილიონი ლარი.
• დაცული ტერიტორიების განვითარება (CNF) - 2.3 მილიონი ლარი.
• ბათუმის ავტობუსების პროექტი (E5P, EBRD) - 4 მილიონი ლარი.
• თბილისის საჯარო სკოლების რეაბილიტაციისა და ენერგოეფექტურობის გაზრდის პროექტი (E5P, CEB) - 4.2 მილიონი ლარი.
• სოფლის მეურნეობის მხარდაჭერის პროგრამა (EU) - 52 მილიონი ლარი.
• და ათობით სხვა პროგრამა...

სკოლები, რომლებშიც შვილები დაგყავთ, ტრანსპორტი, რომლითაც ყოველდღიურად სარგებლობთ, კანალიზაცია, რომელსაც ასევე ყოველდღიურად იყენებთ, ნარჩენების გადამუშავება, პროფესიული განათლება, სოფლის მეურნეობა და ყველა სხვა სფერო მეტწილად ევროკავშირის დაფინანსებულია და სამაგიეროდ ერთადერთ რამეს ითხოვენ! რომ შევქმთან ძლიერი და დამოუკიდებელი ინსტიტუტები, არ ვიძალადოთ ერთმანეთზე და პატივი ვცეთ ერთმანეთის უფლებებს და როცა არცერთ პირობას არ ვასრულებთ და პასუხს გვთხოვენ, სუვერენიტეტის შეზღუდვაში ვდებთ ბრალს და მივითითებთ, რომ მათ ქვეყნებს მიხედონ.

ბოლოს უნდა გთხოვოთ, რომ გააზიაროთ ეს პოსტი, თორემ ბოლო პერიოდში რუსულმა პროპაგანდამ წალეკა ყველაფერი და მათ შორის ჩვენი გონებაც.

მე ვირჩევ ევროპას კი არა, სხვა არჩევანი არ გვაქვს და არც ვსაჭიროებთ მასში, რადგან ჩვენ ევროპის ისეთივე განუყოფელი ნაწილი ვართ, როგორც საფრანგეთი, შვედეთი, ავსტრია და სხვები".