დანგრეული სახლები, ათობით გარდაცვლილი და დაკარგული მოქალაქე - გერმანიაში წყალდიდობას უმძიმესი შედეგი მოჰყვა (ფოტოები)

დასავლეთ გერმანიაში წყალდიდობის შედეგად დაღუპულთა რაოდენობა 20-მდე გაიზარდა, - ინფორმაციას "დოიჩე ველე“ ავრცელებს. გამოცემის ცნობით, დაღუპულებს შორის ორი მეხანძრეცაა. ამასთან, ადგილობრივი სამართალდამცავების ინფორმაციით, გერმანიის რაინლანდ- პფალციან შტატში 6 სახლი დაინგრა და ამ დროისთვის 30 დაკარგულს ეძებენ.

"ამჟამად სახურავებზე გაურკვეველი რაოდენობის ადამიანები იმყოფებიან, რომლებსაც დახმარება სჭირდებათ”, - განაცხადა ქალაქ კობლენცის პოლიციის პრესსპიკერმა.

გავრცელებული ინფორმაციით, წყალდიდობისგან თავის დასაღწევად სახურავებზე 50-მდე ადამიანია ჩარჩენილი.

გერმანიის არმიამ წყალდიდობისგან დაზიანებული ქუჩების გასაწმენდად 230-ზე მეტი ჯარისკაცი და მძიმე ტექნიკა გაგზავნა. სამაშველო სამუშაოებში ჩართულია ვერტმფრენებიც, რომლებიც სახურავებზე მყოფი ადამიანების გადარჩენას ცდილობენ.

სტიქიის ზონაში 200 000 ოჯახი ელექტროენერგიის გარეშეა დარჩენილი. გერმანიის ელექტროენერგიის უდიდეს სადისტრიბუციო კომპანია Westnetz-ში აცხადებენ, რომ მდგომარეობის გამოსასწორებლად ყველა შესაძლო ზომას ახორციელებენ. წყალდიდობის შედეგად რამდენიმე ქალაქში სასმელი წყლის მიწოდებაც შეფერხდა.