ინფიცირებული 3 ჩვილიდან ერთის მდგომარეობა განსაკუთრებით მძიმეა, მას კორონავირუსის "დელტა" შტამი აქვს - რას ამბობენ ციციშვილის კლინიკაში

ციციშვილის კლინიკაში მოთავსებული კორონავირუსით ინფიცირებული 3 ჩვილიდან ერთის ჯანმრთელობის მდგომარეობა განსაკუთრებით მძიმეა.

როგორც „ინტერპრესნიუსს“ ციციშვილის ბავშვთა ახალი კლინიკის სამედიცინო დირექტორმა, მაია ჩხაიძემ განუცხადა, ჩვილი მმართვით სუნთქვაზე იმყოფება. მას კორონავირუსის „დელტა“ შტამი აქვს.

“მათი მდგომარეობა მძიმე რჩება. ერთის ჯანმრთელობის მდგომარეობა განსაკუთრებით მძიმეა, მმართვითი სუნთქვის რეჟიმი პერიოდულად იცვლება. ამ ერთთან, რომელიც განსაკუთრებით მძიმეა, შაბათიდან ჰემოდინამიკური არასტაბილურობა შეიმჩნევა, 2 ინოტროპულ საშუალებაზეა, მაღალი სიხშირით მმართვით სუნთქვაზე. სამივეს მდგომარეობა მძიმეა, ამ ერთის განსაკუთრებით“, - აღნიშნავს მაია ჩხაიძე.

როგორც ის აღნიშნავს, ამ ეტაპზე კლინიკაში კორონავირუსით ინფიცირებული 67 ბავშვი და 60-მდე მშობელია მოთავსებული.