"ყველას, ვინც გადაიტანა კორონავირუსი, ერთი თვის შემდეგ ექნება შესაძლებლობა, აიცრას" - როდიდან იქნება რეგისტრაცია შესაძლებელი?

ჯანდაცვის მინისტრის მოადგილის თამარ გაბუნიას განცხადებით, მოქალაქეები კორონავირუსის გადატანის შემდეგ აცრას 30 დღის შემდეგ შეძლებენ.

როგორც გაბუნიამ აღნიშნა, ვაქცინაციისთვის ამ ჯგუფის ადამიანების რეგისტრაცია სავარაუდოდ, ორშაბათიდან დაიწყება.

"ამერიკის დაავადებათა კონტროლის ცენტრების რეკომენდაციაა, რომ კორონავირუსის გადატანის შემდეგ, ვაქცინაცია ჩატარდეს 30 დღის გასვლისთანავე. ვინაიდან, პირველ ეტაპზე ქვეყანაში გვქონდა ვაქცინების მცირე დოზები, შემოვიღეთ 120-დღიანი ინტერვალი.

დღეს ეს პრობლემა აღმოფხვრილია და ამდენად, ეს ინტერვალი შემცირდება 30 დღემდე, როგორც არის ამერიკის დაავადებათა კონტროლის ცენტრების მიერ გაცემული რეკომენდაცია.

ყველა ადამიანს, ვინც გადაიტანა კორონავირუსი, ერთი თვის შემდეგ ექნება შესაძლებლობა, დარეგისტრირდეს და აიცრას. ამ კვირის ბოლომდე დასრულდება ბრძანების მომზადება. საკოორდინაციო საბჭოზე და იმუნიზაციის საბჭოზე გადაწყვეტილება მიღებულია, ექპერტების ჯგუფი მხარს უჭერს. ვფიქრობ, ორშაბათიდან რეგისტრაცია შესაძლებელი იქნება ამ ჯგუფისთვისაც“,- განაცხადა გაბუნიამ.