ავტორი:

"ლაშამ დარეკა და მითხრა, მამა, ყველა წვალება თვალწინ დამიდგა, როცა რუსი დავამარცხეო... ახლაც ბურანში ვარ" - როგორია გამარჯვების შემდეგ ოლიმპიური ჩემპიონის მამის ემოციები?

"ლაშამ დარეკა და მითხრა, მამა, ყველა წვალება თვალწინ დამიდგა, როცა რუსი დავამარცხეო... ახლაც ბურანში ვარ" - როგორია გამარჯვების შემდეგ ოლიმპიური ჩემპიონის მამის ემოციები?

ტოკიოს 2020 წლის ოპლიმპიადაზე პირველი ოქრო ჩვენს ქვეყანას 21 წლის ლაშა ბექაურმა მოუტანა. ქართველი ძიუდოისტი 90 კგ. წონით კატეგორიაში ასპარეზობდა. მან ფინალში გასასვლელად რუსეთის ოლიმპიური კომიტეტის წარმომადგენელი მიხეილ იგოლნიკოვი ვაზარით დაამარცხა. რუსთან მოპოვებული გამარჯვების შემდეგ, ოლიმპიური ჩემპიონობისთვის ბრძოლა ქართველ ძიუდოისტს გერმანელ ედუარდ ტრიპელთან მოუწია და მეტოქის აქტიური წინააღმდეგობის მიუხედავად, ოქრო არ დათმო და ჩვენს ქვეყანას უდიდესი სიხარული მიანიჭა.

ის მესამე კლასელი ლაშა ბექაური, რომელიც მამამ თავიანთ სოფელში, არხილოსკალოში კახა წიკლაურთან ძიუდოზე შეიყვანა, დღეს ოლიმპიური მედლის მფლობელი გახდა. AMBEBI.GE ლაშას მამას, გელა ბექაურს დაუკავშირდა. მას ვთხოვეთ გაეზიარებინა შვილის გამარჯვებით გამოწვეული ემოციები:

- ბატონო გელა, თავის დროზე, ლაშას თქვენ გაუკვალეთ გზა, თქვენი სურვილი იყო მას ცხოვრება ძიუდოსთვის დაეკავშირებინა. ახლა, როცა ის ოლიმპიადის გამარჯვებული და ჩემპიონია, რას გრძნობთ? თუ ესაუბრეთ ლაშას?

- ჯერ ვერ გავერკვიე ჩემს თავს რა ხდება, ბურანში ვარ, დავდივარ და სახელს ვერ ვარქმევ იმ ემოციას, რასაც ახლა განვიცდი, ნუთუ ეს გამარჯვება ჩემს შვილს ეკუთვნის? დაგვირეკა და ძალიან გახარებულია, მითხრა, მამა, ყველა წვალება და განვლილი გზა დამიდგა თვალწინ, როცა რუსი დავამარცხეო.

ლაშა ბექაური მშობლებთან ერთად

- არ გქონდათ მოლოდინი, რომ გაიმარჯვებდა?

- მას ჰქონდა სერიოზული ტრავმა, რომელიც ერთი თვის წინ მსოფლიოს გუნდურ შეჯიბრებაზე მიიღო, რეაბილიტაციას სჭირდებოდა მინიმუმ 6 თვე. ჩამოკიდებული მხარით ასპარეზობა ძალიან რთულია. ექიმები იმსახურებენ განსაკუთრებულ მადლობას. ზურაბ კახაბრიშვილმა ყველაფერი იღონა იმისთვის, რომ ლაშას შეძლებოდა შეჯიბრში მონაწილეობა. ამ ყველაფრის გათვალისწინებით, წინასწარ იმაზე ფიქრი, რა შედეგს დადებდა, მიჭირდა, თუმცა ეჭვი არ მეპარებოდა, რომ სამშობლოს გასახარად თავს არ დაზოგავდა.

- ფინალს სად უყურეთ?

- მე საერთოდ მის შეჯიბრებებს მარტო ვუყურებ. დედა ტაძარში დადის სულ და ღმერთს ავედრებს მის თავს. ეკრანიდან არ შეუძლია თვალი ადევნოს, ნერვიულობს და განიცდის. ლაშასაც ძალიან სწამს ღმერთი და სულ ამბობს, ჩემი გამარჯვება მისი ნებააო. ჩვენს ოჯახშიც ასე გვწამს, ვისაც როგორი რწმენა არ უნდა ჰქონდეს უფლის. ჩვენ გვჯერა ღმერთის.

- ლაშას პატარა დაიკოსთან განსაკუთრებული ურთიერთობა აქვს. რა რეაქცია ჰქონდა ძმის გამარჯვებაზე თქვენს უმცროს ქალიშვილს?

- რა თქმა უნდა, უყურა, თურმე ეკრანისთვის უკოცნია, რომ გაიმარჯვა.