ავტორი:

ხუთსართულიანი ტორტი დაბადების დღეზე და წვეულება კაჭრეთში - მილიონერი თოშა ქებურია მესამე შვილის მოლოდინშია

ხუთსართულიანი ტორტი დაბადების დღეზე და წვეულება კაჭრეთში - მილიონერი თოშა ქებურია მესამე შვილის მოლოდინშია

28 ივლისს კაჭრეთში, საკუთარ სასტუმროში ბიზნესმენმა თოშა ქებურიამ მეუღლის დაბადების დღე აღნიშნა. ქეთი ჟღენტს 23 წელი შეუსრულდა. წვეულებაზე ცოლ-ქმარმა ხუთსართულიან ტორტზე ერთად ჩააქრეს სანთლები.

გრანდიოზული წვეულების თემა "ალისა საოცრებათა ქვეყანაში" იყო, მაგრამ ამჯერად საოცრებათა ქვეყანაში ქეთი ჟღენტი იმყოფებოდა, რომელსაც მილიონერი მეუღლე წლებია ანებივრებს. ქეთი ჟღენტისა და თოშა ქებურიას წყვილი მესამე შვილს ელოდება.

ამ ფაქტს გოგონა სოციალურ ქსელში მალავდა და კითხვებს ყოველთვის თავს არიდებდა, თუმცა წვეულებაზე მუცელი უკვე შესამჩნევად ეტყობოდა. წყვილს ორი შვილი ჰყავთ, კატერინა და ბუბა, რომელიც ცნობილი ბაბუის მოსახელეა.

თოშა ქებურია სასურველი სასიძოს ტიტულს წლების მანძილზე ინარჩუნებდა. პერიოდულად კი მედიაში ჩნდებოდა ინფორმაცია, რომ ქებურია რომელიმე ცნობილ ქართველ ქალზე იყო შეყვარებული. ქრისტინე იმედაძისა და თოშა ქებურიას „ლავსთორი“ ლამის დაოჯახებამდეც მივიდა. 2017 წელს მედიაში გავრცელდა ინფორმაცია, რომ სასურველმა სასიძომ დამწყებ მოდელს ქეთი ჟღენტს კანში სანაპიროზე სთხოვა ხელი.

"თოშამ ჩემს მშობლებთან ითხოვა, რომ დავნიშნულიყავით და სწავლის დასრულების შემდგომ დავქორწინებულიყავით. ამის შემდეგ გავემგზავრეთ კანში, თოშას მშობლების გასაცნობად. მაგრამ მოხდა ისე, რომ 18 აგვისტოს ლაჟვარდოვან სანაპიროზე მთხოვა ხელი, ეს იყო საყვარელი სიურპრიზი, თოშამ მთხოვა ცაში ამეხედა, სადაც თვითმფრინავი მოფრინავდა სიტყვებით "Katie, marry me", გვერდით კი ჩვენი მეგობრები იმალებოდნენ, რომლებიც ჩემი თანხმობის შემდეგ გამოცვივდნენ და ჩვენთან ერთად გაიზიარეს ჩვენი ბედნიერება", - იხსენებდა ქეთი ერთ-ერთ ინტერვიუში.

თოშა ქებურიას მხოლოდ საქართველოში არ იცნობენ. ჯერ იყო და, ამსტერდამის ერთ-ერთ ქუჩაზე ველოსიპედის სავალ ნაწილზე გადაღებული ავტომანქანის ფოტოები ადგილობრივმა პრესამ გამოაქვეყნა. შემდეგ პარიზში, ეიფელის კოშკის ფონზე დარღვევით გაჩერებული "ლამბორგინის" ფოტოები გავრცელდა. თოშა ბიზნესმენ ბუბა ქებურიას ვაჟია. ბუბა ქებურიას ბიზნესინტერესები რუსეთში, საფრანგეთსა და საქართველოში აქვს.

ბიზნესცენტრი, 4 ვარსკვლავიანი სასტუმრო "ქებურ პალასი", რესტორნები "ტიფლისი", თავადი ბაგრატიონი" და "ტიფლისკი დვორი" მოსკოვში მისი საკუთრებაა. პარიზში რესტორან "ქართული სახლის" მფლობელია. საქართველოში ღვინის ქარხანა აქვს, თბილისსა და კაჭრეთში ის მაღალი კლასის სასტუმრო-რესტორნების ქსელს", ამბასადორს" ფლობს. ბუბა ქებურიას თოშას გარდა, ორი შვილი ჰყავს - გიორგი და ლიკა.