"კრიტიკულ ზღვარზე ვდგავართ, როდესაც შეიძლება ვერ გავცე მოქალაქეს პასუხი, რატომ ვერ გადავარჩინე მისი ოჯახის წევრის სიცოცხლე" - ეკატერინე ტიკარაძე
"მართლა კრიტიკულ ზღვარზე ვდგავართ, როდესაც შეიძლება მე ვერ გავცე ჩვენს რომელიმე მოქალაქეს პასუხი, თუ რატომ ვერ გადავარჩინე მისი ოჯახის წევრის სიცოცხლე და ჩემთვის ეს იქნება ძალიან რთული", - ამის შესახებ ჯანდაცვის მინისტრმა ეკატერინე ტიკარაძემ გორში განაცხადა.
მინისტრის თქმით, ის კარგად იაზრებს ქვეყნაში მდგრადი ეკონომიკის მნიშვნელობას, თუმცა მაშინ, როდესაც "სიკვდილის და სიცოცხლის ბრძოლაში ვიმყოფებით“, უპირველესი რჩება არა ეკონომიკა არამედ თითოეული ადამიანის, სიცოცხლის გადარჩენა.
"არ არის რეკომენდაციები რეკომენდაციებად. ეს არის ძალიან რთული ბრძოლა, რომელიც ჩვენ ძალიან გვიჭირს და მე მზად ვარ დავიკავო ჩვენი გმირი ექიმების გვერდით ადგილი, ჩავიცვა ისევ თეთრი ხალათი და მათთან ერთად დავდგე ამ ურთულეს ბრძოლაში. ძალიან მინდა ვთხოვო საქართველოს ყველა მოქალაქეს, ყველა ქართველსა და არაქართველს, რომელიც დღეს ჩვენთან ერთად ცხოვრობს, აუცილებელია, რომ დაცული იყოს ყველა რეგულაცია და მე ძალიან კარგად ვიაზარებ იმას, თუ რამდენად მნიშვნელოვანია ქვეყნის ეკონომიკური მდგრადობა, მაგრამ მაშინ როდესაც ჩვენ სიკვდილის და სიცოცხლის ბრძოლაში ვიმყოფებით, ალბათ დამერწმუნებით, რომ უპირველესი რჩება არა ეკონომიკა არამედ მთავარია თითოეული ჩვენს გვერდში მდგომი ადამიანის, მეზობლის, ჩვენი ოჯახის წევრის სიცოცხლის გადარჩენა.
ყველას გთხოვთ იგრძენით ის მაღალი მორალური პასუხისმგებლობა, რომლითაც შეგვიძლია დავამარცხოთ კოვიდ-პანდემია. ძალიან დიდი ბოდიში მინდა გადაგიხადოთ, შეიძლება ვიყავი ზედმეტად ემოციური, რაც მე არ მახასიათებს და ყველა აკვირდებით, რომ წელიწად-ნახევარია ჩემი მსგავსი აღელვება საზოგადოებას არ უნახავს, მაგრამ მართლა კრიტიკულ ზღვარზე ვდგავართ, როდესაც შეიძლება მე ვერ გავცე ჩვენს რომელიმე მოქალაქეს პასუხი თუ რატომ ვერ გადავარჩინე მისი ოჯახის წევრის სიცოცხლე და ჩემთვის ეს იქნება ძალიან რთული.
დარწმუნებული ვარ რომ საზოგადოება და ქართველი ხალხი ისევე, როგორც აგვისტოს ომის დროს, კვლავ გაერთიანდება და ჩვენ შევძლებთ და დავამარცხებთ ამ რთულ გამოწვევას“, - განაცხადა ტიკარაძემ.