"ბრმადყოფილზე და....“ - სამტომეული, რომლითაც დოჩანაშვილი მკითხველს დაემშვიდობა, გაყიდვაშია

გურამ დოჩანაშვილს ხშირად აფასებენ, როგორც მწერალს რომელსაც ბიბლია უბიბლიოდ მიაქვს მკითხველამდე. ყველასთვის საყვარელი რომანის „სამოსელი პირველის“ სცენარი ბიბლიიდან უძღები შვილის დაბრუნების ისტორიას ეხმაურება. რომანს ხშირად მწერლის შემოქმედების გვირგვინად მოიაზრებენ. თუმცა დოჩანაშვილმა მკითხველს სიკვდილის წინ დიდი საჩუქარი დაუტოვა.

სიცოცხლის ბოლო პერიოდში გამოიცა სამტომეულის „ბრმადყოფილზე და....“ პირველი ნაწილი. ის მკითხველისთვის ფართოდ ხელმისაწვდომი იყო და დიდი მოწონებაც დაიმსახურა. სამტომეული სრულად ხელმისაწვდომი კი ახლახანს გახდა და მისი შეძენა ექსკლუზიურად „ბიბლუსის“ მაღაზიათა ქსელსა და biblusi.ge-ზეა შესაძლებელი. მნიშვნელოვანია აღინიშნოს, რომ სამტომეულის კომპლექტი ლიმიტირებული ტირაჟით არის გამოცემული, სულ 1000 ცალი.

სამტომეულზე გურამ დოჩანაშვილი ცხოვრების ბოლო რამდენიმე წელი მუშაობდა. ნაწარმოებში გამოყენებულია სიუჟეტი იოანეს სახარების მეცხრე თავიდან, რომელშიც მოთხრობილია ამბავი უსინათლოსთვის თვალის ახელის შესახებ. როგორ გრძელდება თვალახელილის სიცოცხლე, რა არის მნიშვნელოვანი - რას თუ როგორ ხედავ? როგორ იყენებს ადამიანი ღვთისგან მონიჭებულ უდიდეს საჩუქარს - სინათლეს... სწორედ ამ და კიდევ სხვა მნიშვნელოვან თემებს ეხება გურამ დოჩანაშვილის ახალი რომანი, რომელიც სახარებისეული სიუჟეტის კიდევ ერთ განსაკუთრებულ ლიტერატურულ ვარიაციას წარმოადგენს.

საზოგადოებაში, ვისთვისაც სამტომეული ხელმისაწვდომი იყო და წაკითხული აქვთ, უკვე საუბრობენ, რომ ეს არის მისი შემოქმდების საუკეთესო ნაწარმოები. აღსანიშნავია ისიც, რომ წიგნს ბოლოში გამოსამშვიდობებელი ტექსტი აქვს დართული, რომლითაც დოჩანაშვილი თითქოს თავის მკითხველს გამოემშვიდობა. სწორედ ამიტომ „ბრმადყოფილზე და....“ უკვე აღიარებულია წიგნად, რომელიც ყველა ქართველმა უნდა წაიკითხოს.