ვარკეთილში, GWP-ის მიმდებარე ტერიტორიაზე ხანძარი გაჩნდა - რა განცხადებას ავრცელებს კომპანია
ვარკეთილში, გახოკიძის ქუჩაზე "ჯორჯიან უოთერ ენდ ფაუერის" მიმდებარე ტერიტორიაზე ხანძარი გაჩნდა.
როგორც „ინტერპრესნიუსს“ საგანგებო სიტუაციების მართვის სამსახურში განუცხადეს, ცეცხლი GWP-ის ახლოს ბალახს გაუჩნდა. ხანძარი უკვე ლიკვიდირებულია.
გავრცელებული ინფორმაციით, ხანძარი კომპანიის ერთ-ერთ სადგურშიც გაჩნდა, თუმცა მოგვიანებით „ჯორჯიან უოთერ ენდ ფაუერი“ ამ ინფორმაციას გამოეხმაურა და განაცხადა, რომ ინფორმაცია სიმართლეს არ შეესაბამება.
„დღეს ზოგიერთი მედიასაშუალების მიერ გავრცელებული ინფორმაცია იმის შესახებ, რომ „ჯორჯიან უოთერ ენდ ფაუერის“ ერთ-ერთი სადგური იწვის სიმართლეს არ შეესაბამება. ხანძარი გაჩნდა გახოკიძის ქუჩა N146-ის გარე პერიმეტრზე, დაიწვა ბალახის საფარი, რასაც არანაირი კავშირი არ ქონია „ჯორჯიან უოთერ ენდ ფაუერის“ ობიექტთან. ჩვენი ინფორმაციით, ხანძარი ამ დროისთვის ლიკვიდირებულია”, - ნათქვამია განცხადებაში.