"კინო აღარასდროს იქნება ისეთი მიმზიდველი, როგორც ბელმონდოს დროს იყო" - სკანდალები, დიდი პირადი ტრაგედია და კაცი "უცხო ქარიზმით"

გატეხილი ცხვირი, უნიკალური სტილი და თაღლითური ღიმილი - ეს ფრანგი მსახიობის, ჟან-პოლ ბელმონდოს ის მახასიათებლებია, რომლებიც ყველასგან გამოარჩევდა და რომლითაც თავის განსაკუთრებულ ხელწერას ტოვებდა.

"მეამბოხე სული", "ფრანგი მსახიობების ახალი ტალღის სახე", "ლეგენდა", "კაცი, რომელმაც ევროპული კინოს ეპოქა შექმნა" - ასე მოიხსენიებენ კინოკრიტიკოსები დღეს მსახიობს, რომელიც 88 წლის ასაკში 6 სექტემბერს გარდაიცვალა.

ბელმონდო და ფრანგული კინოკლასიკა განუყოფელი ნაწილია. სამსახიობო შესრულების მანერით, უცნაური, ყველასგან განსხვავებული ღიმილით მან ადამიანების გულებში მარტივად შეაღწია.

• ადრეული წლები

ჟან-პოლ ბელმონდო 1933 წლის 9 აპრილს, პარიზის გარეუბანში დაიბადა. მისი მამა მოქანდაკე პოლ ბელმონდო იყო, რომლის ნამუშევრებიც დღეს პარიზულ პარკებს ამშვენებს. მომავალი მსახიობის დედა, სარა მხატვარი იყო. ჟან-პოლ ბელმონდო მოგვიანებით ერთ-ერთ ინტერვიუში ამბობდა, რომ ბოჰემურმა ატმოსფერომ, რომელშიც იზრდებოდა, მის პიროვნებაზე და ასევე ცხოვრების გზაზე, დიდი გავლენა მოახდინა.

• კრივის სიყვარული

მოზარდობის პერიოდმა საკმაოდ რთულად ჩაიარა - მისი ცხოვრებაც ჰგავდა ტიპური, გარეუბნელი ფრანგი ბიჭის ცხოვრებას, ჩხუბი თანატოლებთან მისი ყოველდღიურობის ნაწილი იყო. გარდა ამისა, კრივი ყველაზე მეტად იზიდავდა. ბელმონდომ სკოლაში სწავლაზე უარი თქვა და მოყვარული მოკრივე გახდა.

ბელმონდოს, როგორც მოკრივის დებიუტი 1949 წლის 10 მაისს შედგა, რა დროსაც თავისი მოწინააღმდეგე, რენე დესმარაისი პირველივე რაუნდში ნოკაუტით დაამარცხა. მისი სპორტული კარიერა წარმატებით გრძელდებოდა, დაუმარცხებელი იყო, თუმცა მალევე თავად თქვა უარი ამ სპორტზე.

• "როდესაც სარკეში ჩავიხედე და დავინახე, რომ სხვა ადამიანი ვიყავი, რომ სახე შემეცვალა, ვთქვი, რომ უნდა გავჩერებულიყავი", - იხსენებდა მოგვიანებით მსახიობი. საინტერესოა ისიც, რომ გატეხილი ცხვირი, რომელიც მის სამარკო ნიშნად იქცა, სკოლაში, სათამაშო მოედანზე ჩხუბის შედეგია.

კრივი არ ყოფილა ერთადერთი სპორტი, რომელიც მსახიობს ძალიან უყვარდა. ის ფეხბურთის დიდი გულშემატკივარი იყო. აღსანიშნავია, რომ ბელმონდო ფრანგული საფეხბურთო კლუბის, პარი-სენ ჟერმენის ერთ-ერთი დამფუძნებელია. ბელმონდომ ჩადო ფული ამ კლუბის დაარსებასა და მის განვითარებაში, თუმცა მოგვიანებით დატოვა, რადგანაც, როგორც თვითონვე აღნიშნა - "ეს საქმე არ იყო თავსებადი მის გრაფიკთან." საყვარელი კლუბის გულშემატკივრობაზე კი უარი არასდროს უთქვამს და ხშირად ესწრებოდა მნიშვნელოვან მატჩებს.

• უარი ჯილდოზე

"ჩოჩარა", "გიჟი პიერო", "მისისიპის ქალთევზა", "მოდერატო კანტაბილე", "ბედით განებივრებული," ბორსალინო", "საბრალონი", "პროფესიონალი" - იმ ფილმების არასრული ჩამონათვალია, რომლებშიც მსახიობმა ლეგენდარული გმირები შექმნა.

ბელმონდო ადრეული წლებიდანვე დაინტერესებული იყო მსახიობობით. მოზარდობისას დრამის სკოლაში დადიოდა და მონაწილეობას იღებდა კომედიურ წარმოდგენებში.

1989 წელს ბელმონდო საუკეთესო მსახიობად აღიარეს და სეზარის პრესტიჟული ჯილდო გადასცეს, თუმცა მასზე უარი თქვა. როგორც პრესა წერდა, მიზეზი ის გახდა, რომ ჯილდო, რომელიც ბელმონდოსთვის უნდა გადაეცათ, მხატვარ სეზარ ბალდაჩინის შემოქმედებაზე იყო დაფუძნებული, რომელიც ბელმონდოს მამის კონკურენტი იყო. თავად მსახიობმა კი თქვა, რომ მას არ სჭირდებოდა მსგავსი ჯილდოები, ვინაიდან მისი მთავარი შემფასებელი არა კონკრეტული ჟიური, არამედ, ხალხი, მაყურებელი იყო. ხალხის სიყვარული კი მსახიობს არასდროს აკლდა.

• პირადი ცხოვრება

1952 წლის 4 დეკემბერს ბელმონდო დაქორწინდა ელოდი კონსტანტინზე. წყვილს სამი შვილი გაუჩნდა - პატრიცია, ფლორენცი და პოლი. სამწუხაროდ, მსახიობის ცხოვრებაში 1993 წელს დიდი ტრაგედია დატრიალდა. მისი უფროსი შვილი, პატრიცია ხანძარს ემსხვერპლა.1965 წელს ბელმონდო ცოლს გაშორდა.

მსახიობის ცხოვრებაში არაერთი ქალი იყო. 1965-1972 წლებში მას რომანი ჰქონდა ურსულა ანდრესთან. 1972-1980 წლებში ლაურა ანტონელისთან, 1980-1987 წლებში ბრაზილიელ მსახიობ და მომღერალ მარია კარლოს სოტო მეიერთან, ხოლო 2008-2012 წლებში ბარბარა განდოლფისთან.

1989 წელს, როდესაც მსახიობი 50 წლის იყო, ის შეხვდა 24 წლის მოცეკვავეს, ნეთი ტარდიველს. წყვილი დაქორწინებამდე ერთად ცხოვრობდა ათწლეულზე მეტი დროის განმავლობაში, ხოლო 2002 წელს დაქორწინდნენ. 2003 წლის 13 აგვისტოს გოგონა, სტელა ევა ანჯელინა შეეძინათ, რომელიც 70 წლის ბელმონდოსთვის მეოთხე შვილი იყო. წყვილი ერთმანეთს 2008 წელს დაშორდა.

მთელი კარიერის განმავლობაში ბელმონდო ყოველთვის გავლენიან მსახიობად მიიჩნეოდა და განიხილებოდა, როგორც ფრანგული ახალი ტალღის სახე, რომელმაც კინოში ახალი და სრულიად განსხვავებული ხელწერა შემოიტანა.

აღსანიშნავია, რომ მას არ სურდა ინგლისური ენის სწავლა. ბევრი მიიჩნევს, - რომ არა ეს გარემოება, ბელმონდო კიდევ უფრო პოპულარული იქნებოდა, ხოლო მისი კარიერა კიდევ უფრო შთამბეჭდავი.

ამერიკელი რეჟისორი, კვენტინ ტარანტინო ამბობს, რომ ბელმონდო, ეს არის ზმნა, რომელიც გამოხატავს სიცოცხლის სიყვარულს, ქარიზმას, წყურვილს, სიახლეს და დიდებულებას. ბელმონდოს გარდაცვალების შემდეგ ინგლისელმა რეჟისორმა ედგარ რაითმა აღნიშნა - "კინო აღარასდროს იქნება ისეთი მიმზიდველი, როგორც აქამდე."