ავტორი:

TV "პირველი" - შანაი ბრუკის მკვლელობის საქმეზე დაკავებული "ქართული ოცნების" წევრია

TV "პირველი" - შანაი ბრუკის მკვლელობის საქმეზე დაკავებული "ქართული ოცნების" წევრია

ავსტრალიის მოქალაქის, შანაი ბრუკის მკვლელობის საქმეზე დაკავებული რაფაელ მურსაკულოვი "ქართული ოცნების" წევრია. ინფორმაციას TV "პირველი" ავრცელებს.

"პირველების" მიერ მოპოვებული დოკუმენტებით დგინდება, რომ რაფაელ მურსაკულოვი მთაწმინის ოლქში, საარჩევნო კომისიაში დამკვირვებლად, 2021 წლის 23 აგვისტოს დანიშნეს - ანუ სასტიკი მკვლელობიდან რამდენიმე დღეში.

TV "პირველი" ასევე ავრცელებს ფოტომტკიცებულებას, რომელიც, ტელეკომპანიის ცნობით, საარჩევნო შტაბშია გადაღებული. მურსაკულოვი ოცნების წევრთან პოზირებს.

როგორც ირკვევა, 33 წლის ბრალდებული მმართველ პარტიასთან საკუთარ კავშირს არ მალავდა, რაფაელ მურსაკულოვს facebook-ის პირად გვერდზე სამუშაო ადგილად "ქართული ოცნება" აქვს მითითებული.

შეგახსენებთ, შინაგან საქმეთა სამინისტრომ 31 წლის შანაე ბრუკის განზრახ მკვლელობის ბრალდებით 1988 წელს დაბადებული რ.მ. სისხლის სამართლის კოდექსის 108-ე მუხლით დააკავა, რაც სასჯელის სახით 7-დან 15 წლამდე ვადით თავისუფლების აღკვეთას ითვალისწინებს.

“აღნიშნულ დანაშაულთან, სავარაუდოდ, ხელშეუხებლობაში მყოფი რამდენიმე ათეული პირისგან აღებულ იქნა ბიოლოგიური ნიმუშები, რომლებზეც დაინიშნა გენეტიკური ექსპერტიზები. მოხდა თითოეული მათგანის დეტალური გამოკითხვა. მათ მიერ გამოძიებისთვის მიცემული ინფორმაცია, ალიბები, თუ სად იმყოფებოდნენ შანაე ბრუკის გარდაცვალების დროს, გადამოწმდა სხვადასხვა საგამოძიებო მოქმედებებით. კომპლექსური და მრავალმხრივი საგამოძიებო ღონისძიებების შედეგად მინიმუმამდე შემცირდა ზემოთ აღნიშნულ პირთა წრე, ხოლო გენეტიკური ექსპერტიზის დასკვნით, უტყუარად დადასტურდა ბრალდებულის ვინაობა.

გამოძიების ფარგლებში შეკრებილი მტკიცებულებების, მათ შორის მოწმეთა ჩვენებების, ვიდეოსამეთვალყურეო კამერების ჩანაწერების, გენეტიკური ექსპერტიზის დასკვნის და სხვა მტკიცებულებების საფუძველზე, მოსამართლის განჩინებით მიმდინარე წლის 8 სექტემბერს ბრალდებულის სახით დაკავებულ იქნა 1988 წელს დაბადებული რ.მ.”, - განაცხადა თბილისის პოლიციის დეპარტამენტის დირექტორის მოადგილე კახა მურადაშვილმა ბრიფინგზე.

შანაე ბრუკი 30 ივლისს გაუჩინარდა. როგორც მისი მეგობრები და ნაცნობები აცხადებდნენ, შანაემ გარდაცვალებამდე ერთ-ერთ მათგანთან დარეკა. ზარის დროს ისმოდა მისი ხმა, ქალი შველას ითხოვდა.

ბრუკი მეორე დღეს მთაწმინდის ტერიტორიაზე გარდაცვლილი იპოვეს. თვითმხილველებისა და გავრცელებული კადრების მიხედვით, ქალს სხეულზე რამდენიმე დაზიანება აღენიშნებოდა.

თავდაპირველად შინაგან საქმეთა სამინისტრომ გამოძიება თავისუფლების უკანონოდ აღკვეთის (სისხლის სამართლის კოდექსის 143-ე მუხლი) მუხლით დაიწყო, შემდეგ კი გადააკვალიფიცირა და გამოძიება განზრახ მკვლელობის (სსკ 108-ე) მუხლით გაგრძელდა.

ambebi.ge-მ მკვლელობის საქმეში ახალი დეტალები გაარკვია. წაიკითხეთ ვრცლად