"ეს ბავშვი ადამიანს ვერ მოკლავდა, მკვდრის ეშინია... " - რას აცხადებს 31 წლის შანაე ბრუკის მკვლელობაში ბრალდებულის მამიდა?

"ახალგაზრდა ქალი ყოფილა, რატომ მოკლეს“, - ეს სიტყვები ავსტრალიის მოქალაქის შანაი ბრუკის განზრახ მკვლელობაში ბრალდებულმა რაფაელ მურსაკულოვმა მამიდას, ნუგბარ მურსაკულოვას მას შემდეგ უთხრა, რაც ახალგაზრდა ქალის მკვლელობის შესახებ ინფორმაცია გავრცელდა. ამის შესახებ ბრალდებულის მამიდამ "ინტერპრესნიუსს" განუცხადა. როგორც მურსაკულოვა აცხადებს, ბრალდებული მკვლელობის დღეს, მთელი დღის განმავლობაში სახლში იმყოფებოდა და დანაშაულის შესახებ ტელევიზორიდან შეიტყვეს.

მურსაკულოვას მისი ძმისშვილის მხრიდან დანაშაულის ჩადენის არ სჯერა.

"ეს ბავშვი კაცს ვერ მოკლავდა, მკვდრის ეშინია... ჩვენ მეგობრები ვიყავით, ერთმანეთს არაფერს ვუმალავდით, ამდაგვარი რამე რომ ჩაედინა, მეცოდინებოდა", - განაცხადა მურსაკულოვამ.

კითხვაზე, თუ რის გამო იყო ის წარსულში ნასამართლევი, მურსაკულოვა აცხადებს, რომ "სპილენძის აღების" გამო.

"პატარა ბავშვი, მცირეწლოვანი იყო, სპილენძი ეყარა გორაზე და აკრიფა, ჩავაბარებო და დააკავეს. უპატრონო ბავშვი იყო, ჩასაცმელს მოითხოვდა ალბათ და ამის გამო დააკავეს",- განაცხადა მურსაკულოვამ.

შეგახსენებთ, ავსტრალიის მოქალაქე შანაი ბრუკი 30 ივლისს გაუჩინარდა. ახალგაზრდა ქალის ცხედარი მთაწმინდის ფერდზე 31 ივლისს იპოვეს. აღნიშნულთან დაკავშირებით სამართალდამცავებმა რაფაელ მურსაკულოვი დააკავეს. მას ბრალდება საქართველოს სისხლის სამართლის კოდექსის 179-ე მუხლის პირველი ნაწილით (ყაჩაღობა, ესე იგი თავდასხმა სხვისი მოძრავი ნივთის მართლსაწინააღმდეგო მისაკუთრების მიზნით, ჩადენილი სიცოცხლისათვის ან ჯანმრთელობისათვის საშიში ძალადობით ანდა ასეთი ძალადობის გამოყენების მუქარით), 109-ე მუხლის პირველი ნაწილის ,,გ“ და მესამე ნაწილის ,,გ“ ქვეპუნქტებით (განზრახ მკვლელობა, ჩადენილი სხვა დანაშაულის დაფარვის და მისი ჩადენის გაადვილების მიზნით; ანგარებით) წარედგინა, რაც სასჯელის სახედ და ზომად 16 წლიდან 20 წლამდე ან უვადო თავისუფლების აღკვეთას ითვალისწინებს.

შანაი ბრუკის დამამძიმებელ გარემოებებში ჩადენილი განზრახ მკვლელობის საქმეზე ბრალდებულ რაფაელ მურსაკულოვს აღკვეთის ღონისძიების სახით პატიმრობა დღეს შეეფარდა.