ავტორი:

"მათთან იქნება საუბარი, მხოლოდ როგორც კრიმინალებთან" - მეუფე სტეფანე მასთან დაპირისპირებულ სასულიერო პირებს ეკლესიიდან განკვეთით ემუქრება

"მათთან იქნება საუბარი, მხოლოდ როგორც კრიმინალებთან" - მეუფე სტეფანე მასთან დაპირისპირებულ სასულიერო პირებს ეკლესიიდან განკვეთით ემუქრება

ჭყონდიდის მიტროპოლიტი სტეფანე (კალაიჯიშვილი), მასთან დაპირისპირებულ სასულიერო პირებს, რომლებსაც მღვდელმსახურება რამდენიმე თვის წინ შეუჩერა, ეკლესიიდან განკვეთით ემუქრება. ამის შესახებ მეუფემ ბრიფინგზე ისაუბრა.

ამასთანავე, სასულიერო პირი, ჩანაწერებს, რომლებშიც თავადაც ფიგურირებს, ფაბრიკაციას უწოდებს და ინტიმურ ურთიერთობას კონკრეტული ორგანიზაციის წარმომადგენელთან არ ადასტურებს.

"ახალგაზრდობის საზოგადოებასთან ურთიერთობის პერსპექტივების დაგეგმვის ცენტრი საერთოდ ბუნებაში არ არსებობს და არც არსებობს ბუნებაში მისი თანამშრომელი. ასე, რომ ეს სუს-ის ინფორმაცია თუ არის, გამოდის, რომ აბსოლუტურად უნიათოა ყველა, შეუძლებელია, ასეთ ორგანიზაციაში მე არასოდეს არ ვყოფილვარ და არც ასეთ ადამიანთან არ მქონია კავშირი", - მიტროპოლიტი.

მეუფე მასთან დაპირისპირებულ სასულიერო პირებს "კრიმინალებს" უწოდებს და ამბობს, რომ განკვეთის შემდეგ "პასუხს აგებენ, როგორც საერო პირები".

"მათ, როგორც ბერებს, აღარ ველაპარაკებით. მათთან იქნება საუბარი, მხოლოდ როგორც კრიმინალებთან. მათი სახელები მამებით და საეკლესიო სახელებით დასრულდება ძალიან მალე. განვკვეთავ, კი, ჩვეულებრივი ერის ხალხი იქნებიან და ამ ერის ხალხის დონეზე მოეკითხებათ პასუხი ყველას. კიდევ ვინც გაბედავს ასეთ რამეს, ყველას გაეცემა კანონიკური პასუხი", - ამბობს მეუფე სტეფანე.

ცნობისთვის, გუშინ, სალხინოში, ამბროსი ხელაიას სახელობის სკოლასთან მიტროპოლიტ სტეფანეს სასულიერო პირები დახვდნენ და მისგან პასუხები მოითხოვეს იმ ჩანაწერებზე, რომელიც მასთან დაკავშირებით სუს-ის ფაილებშია. მეუფემ შეკითხვებს არ უპასუხა და სასულიერო პირებს კრიმინალები უწოდა.