"ის, რაც საქართველოს სჭირდება, არის მშვიდი გარემო და არა პოლიტიკური არასტაბილურობა და ძალადობა" - აშშ-ის ელჩი სააკაშვილის ჩამოსვლასა და წინასაარჩევო გარემოზე
შეგვიძლია ყველა შევთანხმდეთ, რომ ის, რაც საქართველოს სჭირდება, არის წყნარი, მშვიდი გარემო და არა პოლიტიკური არასტაბილურობა და ძალადობა, - ამის შესახებ აშშ-ის ელჩმა საქართველოში კელი დეგნანმა განაცხადა, რითაც უპასუხა შეკითხვას, რას ფიქრობდა სააკაშვილის საქართველოში ჩამოსვლის გეგმასთან დაკავშირებით.
„არ ვაპირებ სპეკულირებას იმაზე, რა შეიძლება გააკეთოს ან არ გააკეთოს მიხეილ სააკაშვილმა, ბევრი კომენტარი გაკეთდა, მათ შორის თავად სააკაშვილის მხრიდან. ვფიქრობ, შეგვიძლია ყველა შევთანხმდეთ, რომ ის, რაც საქართველოს სჭირდება, არის წყნარი, მშვიდი გარემო და არა პოლიტიკური არასტაბილურობა და ძალადობა და ჩვენ ყველამ ამას ხელი უნდა შევუწყოთ,“ - აღნიშნა ელჩმა.
მისივე თქმით, არც წინასაარჩევნო პერიოდში და არც ზოგადად, დაშინებისა და შევიწროების ფაქტების ადგილი არ არის.
„ბოლო დღეებში ვიხილე საარჩევნო გამოკითხვები, რომელიც წინასწარ მეტყველებს, იმაზე, რომ ამ არჩევნებზე საკმაოდ დიდი იქნება ამომრჩეველთა აქტივობა, ძალიან მოხარული ვარ. რა თქმა უნდა, ეს ძალიან კარგია, როცა ხალხს სურს მივიდეს საარჩევნო უბნებზე და გამოხატოს თავისი პოზიცია. იმედი მაქვს, რომ იქნება მშვიდობიანი და წყნარი გარემო იმისთვის, რომ ადამიანებს მიეცეთ საშუალება მივიდნენ საარჩევნო უბნებზე და გამოხატონ თავისი მოსაზრება. ჩვენ გამოვთქვით შეშფოთება დაშინების, შევიწროების იმ ფაქტებთან, რაზეც იყო ცნობები. ვთქვით და ახლაც ვიმეორებთ - არც წინასაარჩევნო პერიოდში და არც ზოგადად ამ ფაქტების ადგილი არ არის. ასეთი ფაქტები და ასევე სიძულვილის ენა კიდევ უფრო ხელს უწყობს საზოგადოების ერთმანეთთან დაშორებას, რომელიც ისედაც უკვე პოლარიზებულია. ასევე, მიუღებელია თავდასხმები მედიაზე, სამოქალაქო საზოგადოებაზე, იმიტომ, რომ ჟურნალისტებმა, მედიამ უნდა შეძლოს საკუთარი საქმიანობის მშვიდ გარემოში განხორციელება, მოქალაქეების ინფორმირება იმისთვის, რომ მოქალაქეებს არჩევნების დროს შეეძლოთ ინფორმირებული არჩევანის გაკეთება. შესაბამისად, ეს არის ძალიან მნიშვნელოვანი ნაწილი ქვეყნის დემოკრატიული განვითარებისა. თითოეულმა არჩევნებმა უნდა აჩვენოს გაუმჯობესება, ის, რომ უკეთესია წინაზე. სწორედ ეს იქნება ნიშანი დემოკრატიული განვითარების მიმართ ქვეყნის ერთგულებისა. იმედი მაქვს, რომ ამ არჩევნებზე ასე იქნება“, - განაცხადა კელი დეგნანმა.
მისივე თქმით, აშშ-ს საელჩოს მხრიდან არჩევნებს 100 დამკვირვებელი დააკვირდება.
„ესენი არიან არაფორმალური დამკვირვებლები. ვიცით, რომ ამ არჩევნებს დააკვირდება ძალიან ბევრი საერთაშორისო და ადგილობრივი პროფესიონალი დამკვირვებელი. ეს კიდევ ერთხელ მიუთითებს იმაზე, თუ რამდენად მნიშვნელოვანია ეს არჩევნები საქართველოს საერთაშორისო მეგობრებისა და პარტნიორებისთვის. შესაბამისად, ყურადღება იქნება ძალიან მაღალი ამ პროცესების მიმართ და ეს არ შეეხება მხოლოდ არჩევნების დღეს, ეს შეეხება როგორც წინასაარჩევნო კამპანიას, ასევე არჩევნების დღეს და შემდგომშიც განვითარებულ მოვლენებს. ამ ყველაფერს დიდი ყურადღებით დააკვირდება ყველა, შესაბამისად, ჩვენი დაჟინებული მოწოდებაა მშვიდი, წყნარი გარემო“, - განაცხადა კელი დეგნანმა.