"არც ჩვენ დავახევთ კალთებს..." - მამუკა მდინარაძე გახარიას პასუხობს
არც ჩვენ დავახევთ კალთებს გახარიას თანამშრომლობისთვის, - ამის შესახებ „ქართული ოცნების“ აღმასრულებელმა მდივანმა მამუკა მდინარაძემ უმრავლესობის სხდომის დასრულების შემდეგ ბრიფინგზე განაცხადა, რითაც გამოეხმაურა პარტია „საქართველოსთვის“ თავმჯდომარის, გიორგი გახარიას განცხადებით, რომლის მიხედვითაც არჩევნების მეორე ტურზე მხარს არც „ქართულ ოცნებას“ და არც „ნაციონალურ მოძრაობას“ დაუჭერს.
მდინარაძე დარწმუნებულია, რომ „ქართული ოცნება“ მეორე ტურში გაიმარჯვეს.
„არც ჩვენ დავახევთ კალთებს გიორგი გახარიას თანამშრომლობისთვის. მინდა მივმართო როგორც მის, ასევე ნებისმიერ ამომრჩეველს, რომ წინ არის მნიშვნელოვანი და პრინციპული მეორე ტური. მეორე ტურში დარწმუნებულები ვართ, რომ იქნება გამარჯვება, რომელიც მათივე სპეკულაციურად დასმულ კითხვაზე რეფერენდუმთან მიმართებაში გასცემს საკადრის პასუხს. როდესაც რომელიღაცა პოლიტიკური ჯგუფი კადრულობს იმას, რომ წინასწარ შემოდის წაგებულ თამაშში იმიტომ, რომ ხმები გამოართვას, წაართვას „ქართულ ოცნებას“ „ნაციონალური მოძრაობის“ სასარგებლოდ, მისი მხრიდან მსგავსი ლოგიკა, როგორც მინინმუმ მარტივად, რომ ვთქვათ, მისაღები არ არის. ბევრი ნამდვილად არ არის ოლქები, სადაც შეიძლება უმრავლესობა ვერ შევქმნათ, ერთი არის ასეთი და შეიძლება ეს იყოს ზუგდიდში, სხვაგან ჩვენ უმრავლესობას დავაკომპლექტებთ. ზუგდიდშიც ვნახოთ როგორ იქნება. ჩვენ ამ უმრავლესობით ვაპირებთ საქმე გავაკეთოთ, სხვები აპირებენ არეულობას“, - განაცხადა მდინარაძემ.