ავტორი:

"მათთვის მნიშვნელოვანია არა ადამიანების უსაფრთხოება,  არამედ შემოსავალი" - Facebook-ის ყოფილი თანამშრომლის სკანდალური ბრალდებები მარკ ცუკერბერგს

"მათთვის მნიშვნელოვანია არა ადამიანების უსაფრთხოება,  არამედ შემოსავალი" - Facebook-ის ყოფილი თანამშრომლის სკანდალური ბრალდებები მარკ ცუკერბერგს

ბოლო დღეებია სოციალურ ქსელ "ფეისბუქისა" და მისი დამფუძნებლის, მარკ ცუკერბერგის მიმართ კრიტიკა არ წყდება. 4 ოქტომბერს Facebook-ი და აპლიკაციები, რომლებსაც ის ფლობს, Messenger-ი, Instagram -ი და WhatsApp-ი 6 საათის განმავლობაში იყო გათიშული და აღნიშნულის გამო, კომპანიის ხელმძღვანელობა მწვავე კრიტიკის ობიექტი გახდა. მარკ ცუკერბერგს კი ბოდიშის მოხდა მოუწია.

თუმცა მხოლოდ ეს არ არის - "ფეისბუქის" ხელმძღვანელობას ღიად დაუპირისპირდა ყოფილი თანამშრომელი, ფრენსის ჰაუგენი, რომელმაც CBS News-თან განაცხადა, რომ კომპანიის ხელმძღვანელობისთვის არ არის მნიშვნელოვანი ადამიანების უსაფრთხოება და მათთვის პრიორიტეტული მხოლოდ შემოსავალია.

ჰაუგენმა თქვა, რომ კომპანიის საიტები და აპლიკაციები "ვნებს ბავშვებს, იწვევს განხეთქილებას, დაპირისპირებას და ზიანს აყენებს დემოკრატიის ხარისხს.“

37 წლის ფრენსისი, რომელიც პროდუქტების მენეჯერად მუშაობდა, ამბობს, რომ კომპანიისთვის უსაფრთხოებაზე უპირატესი მოგებაა.

ჰაუგენმა განცხადებით, მან "ფეისბუქის" შიდა დოკუმენტები Wall Street Journal -ს გადასცა. აღნიშნული დოკუმენტების გამოყენებით კი გამოცემამ გამოაქვეყნა კვლევა, რომლის მიხედვითაც, "ინსტაგრამის" აპლიკაცია მავნებელია გოგონების ფსიქიკური ჯანმრთელობისთვის.

  • "კომპანიის ხელმძღვანელობამ იცის, როგორ აქციოს "ფეისბუქი" და "ინსტაგრამი" უსაფრთხო სისტემად, მაგრამ არ სურთ საჭირო ცვლილებების განხორციელება, რადგანაც მათთვის თავიანთი ასტრონომიული შემოსავალი ადამიანებზე გაცილებით მნიშვნელოვანია“, - აცხადებს ჰაუგენი.

ის აკრიტიკებს "ფეისბუქის" დამფუძნებელსა და აღმასრულებელ დირექტორს, მარკ ცუკერბერგს განუსაზღვრელი კონტროლისთვის. მისი თქმით, გოგონებისთვის აღნიშნული სოციალური ქსელები დამღუპველია, რადგანაც გარეგნობის გამო, ფსიქიკურ პრობლემებს უჩენთ.

ცნობისთვის, ბოლო პერიოდში განვითარებული მოვლენების გამო, მარკ ცუკერბერგმა ბოდიში მოიხადა. ამასთან, მანვე ყოველივეს შედეგად 6 მილიარდი დოლარის ზარალი ნახა და მსოფლიოს უმდიდრესი ადამიანების რეიტინგში მეექვსე ადგილზე გადაინაცვლა.