"როცა კორპუსს ორ სართულს დააშენებ და ძირს გამოუთხრი, შედეგად ამას მიიღებ" - რას ჰყვება არმაზ ახვლედიანი, რომელიც ჩამონგრეული კორსპუსის წინ ცხოვრობს

არმაზ ახვლედიანი, რომელიც ბათუმში, 26 მაისის ქუჩაზე იმ კორპუსის წინ ცხოვრობს, სადაც აფეთქება მოხდა, ტრაგედიის მიზეზებზე საუბრობს.

ის არ გამორიცხავს, რომ მომხდარი კორპუსზე არსებულ უკანონო დაშენებასა და სადარბაზოს პირველ სართულზე მიმდინარე სარემონტო სამუშაოებს უკავშირდებოდეს.

"შეძრული ვარ იმით, რაც ხდება ბათუმში. ჯოჯოხეთია და ბათუმშიც ჯოჯოხეთი მოაწყო ამ ხელისუფლებამ. დადგინდება კონკრეტული მიზეზი ჩამონგრევის, მაგრამ ეს ჯოჯოხეთი არ დასრულდება მანამ, სანამ არ დასრულდება ხელისუფლების მიერ წახალისებული ურბანული დანაშაული. არავინ კითხულობს რა შენდება. წარმოიდგინეთ, როგორ შეიძლება 5 სართული იყოს განსაზღვრული და იმაზე კიდევ 3 დაადგა. ასეთი შემთხვევა ბათუმში ბევრია.

ეს კორპუსი ჩემს წინ არის. ძველი საბჭოთა კორსპუსია. გუშინ მე ვიყავი ბათუმში და ამ კორპუსის კუთხეში კომერციული ფართი იყო გამოშიგნული. არ შეილება საცხოვრებელი სახლი ასეთ ფართად გადააქციო, როდესაც არ ითვალისწინებ მის შესაძლებლობას, რას გაუძლებს, რას - არა. სრული პასუხისმგებლობით ვამბობ, რომ მიწისძვრის შემთვევაში ბათუმი მიწასთან გასწორდება, რადგან ყველგან უკანონო მშენებლობებია. არაფერი გათვალისწინებული არ არის, მათ შორის არც მშენებლობის ხარისხი. რაც ახლა ხდება აქ, ეს არის აღვირახსნილი დანაშაული.

ეს არის ბათუმის პირობებში ერთ-ერთი ყველაზე დიდი კორპუსი. ის სამ ქუჩაზეა განთავსებული. ჩამოშლა მოხდა ჩემი სახლის წინ. ეს არის შუა ნაწილი. ამ კორსპუსის თავზე იყო დაშენება, რომელიც ამ ყველაფრის მერე, ექსპერტების შეფასების საგანი უნდა გახდეს.

როდესაც კორპუსს თავზე ორ სართულს დააშენებ და ძირს გამოუთხრი, შედეგად ამას მიიღებს" - ამბობს ახვლედიანი.