"მაშველებთან გავიდა კონტაქტზე... უთხრა, რომ თავს ნორმალურად გრძნობს" - რას ჰყვება აჭარის ჯანდაცვის ექსმინისტრი ნანგრევებში მოყოლილ შვილიშვილზე

ბათუმში, 26 მაისის ქუჩაზე საცხოვრებელი კორპუსის ნანგრევებში მოყოლილთა შორის არის აჭარის ჯანდაცვის ყოფილი მინისტრის აკაკი ბერიძის შვილიშვილი 32 წლის ზვიად თავდგირიძე. აკაკი ბერიძემ Ambebi.ge -ს განუცხადა, რომ მისი შვილიშვილი ცოცხალი და კონტაქტურია.

"მაშველებთან გავიდა კონტაქტზე. ესაუბრა მათ, რომ ცოცხალია და თავს ნორმალურად გრძნობს. ჩვენ არ გვისაუბრია. იმედი გვაქვს, მშვიდობით დასრულდება ყველაფერი", - ამბობს აკაკი ბერიძე.

სამაშველო სამუშაოები, რომელშიც რამდენიმე ასეული მაშველი მონაწილეობს, ამ წუთებშიც მიმდინარეობს. ადგილზე იმყოფება პრემიერი და შს მინისტრიც. ვახტანგ გომელაურის ინფორმაციით, ნანგრევებში, სავარაუდოდ, 10-15 ადამიანია მოყოლილი. ცოტა ხნის წინ მაშველებმა ნანგრევებიდან ქალი ამოიყვანეს, რომლის ჯანმრთელობის მდგომარეობა, ექიმების შეფასბით, მძიმეა. მან ნანგრევების ქვეშ 9 საათი გაატარა.

აღნიშნული ქალბატონი ორი მცირეწლოვანი ბავშვის დედაა, რომლის შესახებაც მთელი დღის განმავლობაში ვრცელდებოდა ინფორმაცია. ნანგრევებიდან ამოყვანილი ქალი კლინიკაში გადაიყვანეს.

• იხილეთ ასევე: "სასწრაფოს ავტომობილში გული გაუჩერდა, თუმცა საავადმყოფოში გულის მუშაობა აღუდგინეს" - როგორია ნანგრევებიდან ამოყვანილი ქალის ჯანმრთელობის მდგომარეობა