ბიზნესისა და ტექნოლოგიების უნივერსიტეტმა ციფრული მარკეტინგის საბაკალავრო პროგრამა წარადგინა
ბიზნესისა და ტექნოლოგიების უნივერსიტეტი, რომელიც მეხუთე წელია, სტუდენტებს გამორჩეულ და მუდმივად განახლებად სასწავლო პროგრამებს სთავაზობს, ახალი სასწავლო წლიდან, ციფრული მარკეტინგის აკრედიტებული საბაკალავრო პროგრამის განხორციელებას იწყებს. მიღება 2022-2023 სასწავლო წლიდან გამოცხადდება.
ბიზნესისა და ტექნოლოგიების უნივერსიტეტის რექტორი ნინო ენუქიძე აღნიშნავს, რომ პროგრამაზე მუშაობა 2 წლის წინ დაიწყო და ამ პროცესში აქტიური თანამშრომლობა მიმდინარეობდა სხვადასხვა კომპანიას თუ კრეატიულ სააგენტოსთან, რომლებიც სამომავლოდ პროგრამის სტუდენტებისა და კურსდამთავრებულების დამსაქმებლებად მოიაზრებიან.
„მომავალი სასწავლო წლიდან პროგრამაზე მიღება გამოცხადდება. საწყის ეტაპზე ჩარიცხული სტუდენტების რაოდენობა იქნება 200. ისინი ციფრული მარკეტინგის კონკრეტული საგნების პარალელურად, ბევრ ინტერდისციპლინარულ საგანს შეისწავლიან. ჩვენი მიზანია, სტუდენტი აღვჭურვოთ იმ ცოდნითა და უნარებით, რომელიც თანამედროვე სამყაროში ტექნოლოგიების გამოყენებით მარკეტინგული მიზნებისა და ზოგადად, სტრატეგიული განვითარების გეგმის შესასრულებადაა საჭირო. ამ პროცესში სტუდენტები აქტიურად გამოიყენებენ შესაძლებლობებს, რომელსაც მათ ჩვენი უნივერსიტეტის მაღალტექნოლოგიური ლაბორატორიები სთავაზობენ. მნიშვნელოვანია ისიც, რომ პროგრამა საერთაშორისოდ აღიარებულია. ეს კი ნიშნავს, რომ სტუდენტებს წამყვანი დასავლური უნივერსიტეტების გაცვლით პროგრამებში მონაწილეობის მიღება შეეძლებათ,“ - აცხადებს ნინო ენუქიძე.
BTU-ს ციფრული მარკეტინგის საბაკალავრო პროგრამის ხელმძღვანელი ანო გოგიჩაძე იქნება. მისი განმარტებით, სტუდენტები თეორიულ ცოდნასთან ერთად მნიშვნელოვან პრაქტიკულ გამოცდილებას მიიღებენ. მნიშვნელოვანია პროგრამის ფარგლებში პარტნიორობა ქართული ციფრულ მარკეტინგულ სააგენტოებსადა სხვადასხვა საერთაშორისო ორგანიზაციებთან. ურთიერთთანამშრომლობის შეთანხმება წამყვან კომპანიებთან უკვე შედგა, პროგრამის ყველა სტუდენტი, ციფრული მარკეტინგის მიმართულებით, სწავლის პერიოდშივე დასაქმდება.
„ციფრული მარკეტინგის საბაკალავრო პროგრამა კიდევ ერთი ძალიან საინტერესო და მნიშვნელოვანი პროგრამაა, რომელსაც ბიზნესისა და ტექნოლოგიების უნივერსიტეტი სტუდენტებს შესთავაზებს. ციფრული მარკეტინგის სპეციალისტი დღეს მეტად მოთხოვნადი პროფესიაა და მასზე მოთხოვნა კიდევ უფრო იზრდება. პროგრამის შედგენაში ბევრმა მაღალკვალიფიციურმა სპეციალისტმა მიიღო მონაწილეობა. ისინი BTU-ს პარტნიორები და ჩვენი ახალი სასწავლო პროგრამის სტუდენტების პოტენციური დამსაქმებლები არიან. სწორედ ამიტომ პროგრამის შედგენის პროცესში გავითვალისწინეთ მათი ხედვა, ის მოთხოვნები და უნარები, რომელიც თანამშრომლის შერჩევის დროს მათთვის მნიშვნელოვანია. ისინი სრულ მზაობას გამოთქვამენ, რომ სტუდენტები სწავლის პროცესშივე დაასაქმონ,“ - განმარტავს ანო გოგიჩაძე.
ციფრული მარკეტინგის პროგრამის პრეზენტაცია და პანელური დისკუსია კრეატიული სააგენტოების წარმომადგენლების, უნივერსიტეტის პარტნიორების, ციფრული მიმართულების ლიდერებისა და დარგში მოწინავე სპეციალისტების ჩართულობით გაიმართა. ღონისძიების მოდერატორი აკო ახალაია იყო. პანელისტებს შორის კი იყვნენ: ფრილანსერი, ციფრული მარკეტინგის კონსულტანტი პავლე გაბრიჭიძე, TBC-ის საცალო სეგმენტის მარკეტინგისა და ციფრული მიმართულების ხელმძღვანელი ტატო ნორაკიძე, „საქართველოს ბანკის” უფროსი ციფრული მარკეტერი ზურა კვინიკაძე, „კრაკენის” თანადამფუძნებელი თორნიკე ტურიაშვილი და „ვინდფორსის“ ციფრული მიმართულების ხელმძღვანელი ნიკა გვახარია.
„ციფრული მარკეტინგი ძალიან კომპლექსური სფეროა. აუცილებელია, რომ კადრი მულტიფუნქციური იყოს. მან უნდა იცოდეს: სტატისტიკია, დემოგრაფიული კომპონენტები, მათემატიკა... ამ ყველაფერს კი უკვე ემატება ციფრული კომპონენტები და საბოლოოდ კადრმა ამ ყველაფრის ერთმანეთთან დაკავშირება და მათი გამოყენებით მიზნის მიღწევა უნდა შეძლოს. ამ დრომდე საქართველოში ციფრული მარკეტინგის მიმართულებით არაერთი კურსი არსებობდა, თუმცა გრძელვადიანი და სრულყოფილი სასწავლო პროგრამის შექმნა ძალიან მნიშვნელოვანია,“ - აღნიშნავს „ვინდფორსის“ ციფრული მიმართულების ხელმძღვანელი ნიკა გვახარია.
“ციფრული მარკეტინგი ისე სწრაფად ვითარდება, რომ ამ მიმართულების ცალკე სასწავლო პროგრამად გამოყოფა მნიშვნელოვანი. ბიზნესისა და ტექნოლოგიების უნივერსიტეტში ამ მიმართულებით უკვე ვმუშაობდით, თუმცა ცალკე საბაკალავრო პროგრამის შექმნა სფეროსა და ინდუსტრიის აღიარებაა. ძალიან დროული და საჭირო ნაბიჯი იყო. ეს მნიშვნელოვანია კრეატიული და მარკეტინგული სააგენტოებისთვის, რომლებიც მუდმივად საინტერესო კადრების ძებნაში არიან,“ - აცხადებს მარკეტინგული კომპანია 4MEDIA-ს დამფუძნებელი და BTU-ს ასოცირებული პროფესორი გიორგი კენჭუაშვილი.
მრავალფეროვანია იმ პოზიციების ჩამონათვალი, რომლებზეც შეუძლია სტუდენტსა თუ კურსდამთავრებულს მუშაობა: მარკეტერი, ციფრული მარკეტერი, ბრენდ-მენეჯერი, რეკლამის მენეჯერი, ექაუნთ მენეჯერი, გაყიდვების მენეჯერი და სხვ. კურსდამთავრებულის პოტენციური დამსაქმებლები შეიძლება იყვნენ მარკეტინგული და კრეატიული პროექტების შემქმნელი სააგენტოები, მედიაჰოლდინგები, მარკეტინგული კვლევების და მარკეტინგული კონსალტინგის სექტორის კომპანიები, ბანკები, საინვესტიციო კომპანიები და სხვა ნებისმიერ ორგანიზაცია, რომელსაც მარკეტინგის დეპარტამენტი აქვს.
კურსზე ჩარიცხულ სტუდენტებს, ევროპის მრავალი წამყვანი უნივერსიტეტი შესაძლებლობას აძლევს, მონაწილეობა მიიღონ სრულად დაფინანსებულ, გაცვლით პროგრამებში და შეიძინონ ცოდნა იმ დასავლური სტანდარტებისა, რომელიც მათ მსოფლიოში გამოარჩევს.
ციფრული მარკეტინგის ახალი, აკრედიტებული საბაკალავრო პროგრამა BTU-ში, სტუდენტებს 2022 წლიდან მიიღებს.
იხილეთ მცირედი ჩამონათვალი იმ საგნებისა, რომელსაც მომავალ ციფრულ მარკეტერებს ვასწავლით:
- ციფრული მარკეტინგი
- სოციალური მედია მარკეტინგი
- ვიზუალური კომუნიკაცია Adobe პროდუქტების გამოყენებით
- Google-ის მარკეტინგული ინსტრუმენტები
- Google-ის ინსტრუმენტები ბიზნეს ანალიტიკისთვის
- Microsoft Power BI ანალიტიკური ინსტრუმენტები
- CRM - მომხმარებელთან ურთიერთობის მენეჯმენტი Salesforce-ის გამოყენებით
- CRM - მომხმარებელთან ურთიერთობის მენეჯმენტი Microsoft 365 Dynamics-ის გამოყენებით
- ელექტრონული კომერცია და ელკომერციის პლატფორმები
- მომხმარებლის გამოცდილება და UX/UI დიზაინი
- ციფრული ტექნოლოგიების პრინციპები
- ციფრული წიგნიერება და კიბერეთიკა და სხვა.
პროგრამაზე ჩაბარებით დაინტერესებულ აბიტურიენტთა რეგისტრაცია მიმდინარეობს ბმულზე.