სერიალ "მეგობრების" ვარსკვლავი სიმსივნით გარდაიცვალა
პოპულარული სერიალის, "მეგობრების" ვარსკვლავი, მსახიობი ჯეიმს მაიკლ ტაილერი 59 წლის ასაკში გარდაიცვალა. ტაილერი 2018 წლიდან ებრძოდა პროსტატის სიმსივნეს.
"ერთხელაც რომ შეხვედროდი მას, სამუდამო მეგობარს შეიძენდი“ - ასე ახასიათებენ ტაილერს ოჯახის წევრები.
"გმადლობ იმ მხიარულებისთვის,რაც ტელესერიალსა და ჩვენს ცხოვრებაში შემოიტანე. მოგვენატრები“, - ამ სიტყვებით გამოემშვიდობა მეგობარსა და კოლეგას მსახიობი ჯენიფერ ენისტონი.
ტაილერის პერსონაჟი - გუნტერი ტელეშოუში ყავის სახლში მუშაობდა და ჯენიფერ ენისტონის გმირზე, რეიჩელზე იყო შეყვარებული.
"მეგობრების" სხვა მსახიობებმაც მტკივნეულად განიცადეს კოლეგის სიკვდილი. ჯოის როლის შემსრულებელმა, მეთ ლებლანკმა "ინსტაგრამზე" სერიალიდან მათი ერთობლივი კადრები ატვირთა - "ჩვენ ბევრი გვიცინია ერთად. მშვიდად განისვენე, ჩემო მეგობარო“ - წერს მსახიობი.
"მსოფლიო მას როგორც მეშვიდე მეგობარს, გუნტერს, ისე იცნობდა, მაგრამ ჯეიმსი ახლობლებისთვის იყო მსახიობიც, მუსიკოსიც, სიმსივნესთან ბრძოლის აქტივისტიც და მოსიყვარულე მეუღლეც.“ - ეს მსახიობის მენეჯერის მიერ გამოქვეყნებული გამოსამშვიდობებელი წერილია.
ტაილერმა სერიალის 150 ეპიზოდში ითამაშა და მისი პერსონაჟი - გუნტერი დღემდე პოპულარულია.
მოამზადა ანა სიბოშვილმა