"კაი, ჩემო ძმაო, გასაგებია ყველაფერი..." - ნინო ლომჯარიას პასუხი კახა კალაძესა და ირაკლი კობახიძეს

"კაი, ჩემო ძმაო, გასაგებია ყველაფერი..." - ასე ეხმაურება ნინო ლომჯარია თბილისის მერის კახა კალაძისა და მმართველი გუნდის დღევანდელ განცხადებებს, რომელიც მიხეილ სააკაშვილის ჰოსპიტალიზაციასთან დაკავშირებით ომბუდსმენის დასკვნას მოჰყვა.

"დღის ბოლოს, მოკლედ რომ შევაჯამო განვითარებული მოვლენები: სახალხო დამცველმა აიღო ხელისუფლების მიერ შექმნილი კონსილიუმის დასკვნა, რომლის თანახმადაც მიხეილ სააკაშვილის ჰოსპიტალიზაცია უნდა განხორციელდეს ისეთ კლინიკაში, სადაც იქნება მრტ, კტ, დუპლერ სკანირების აპარატი;

2. ექსპერტები წავიდნენ ციხის საავადმყოფოში და შეამოწმეს, იყო თუ არა ადგილზე აღნიშნული აპარატურა; აღმოჩნდა, რომ არ იყო, რის შესახებაც საჯაროდ დავწერეთ; ამას მოყვა შემდეგი რეაქციები:

დეპუტატმა ალუდა ღუდუშაურმა განაცხადა, რომ სახალხო დამცველი არის პოლიტიკურად მიკერძოებული;

2. ბ-ნმა ირაკლი კობახიძემ განაცხადა, რომ აღარ დაუშვებენ, რომ სახალხო დამცველი აღარ იყოს პარტიის კონტროლის ქვეშ;

3. დედაქალაქის მერმა ნერვიულად გადაიხარხარა...რა შეიძლება ვთქვა?

კაი, ჩემო ძმაო, გასაგებია ყველაფერი..." - წერს ლომჯარია.

ცნობისთვის, სახალხო დამცველის რწმუნებულებმა საქართველოს მესამე პრეზიდენტის მიხეილ სააკაშვილის შესაძლო მიღებისთვის N18 დაწესებულების მზადყოფნის ხარისხი შეამოწმეს. ომბუდსმენის განცხადების თანახმად, შემოწმების შედეგად დადგინდა, რომ დაწესებულებაში არსებული ვითარება, სამედიცინო უზრუნველყოფის კუთხით, სრულფასოვნად არ შეესაბამება ექიმთა მულტიფუნქციური ჯგუფის მიერ გაცემულ 2021 წლის 23 ოქტომბრის დასკვნასა და რეკომენდაციებს, ასევე არსებობს გარკვეული რისკები უსაფრთხოების თვალსაზრისით.