"მდგომარეობა ძალიან სერიოზული და საგანგაშოა"- აფხაზეთის ე.წ. ჯანდაცვის მინისტრი

"გვაქვს კოვიდ პაციენტების რაოდენობის ზრდა. მდგომარეობა ძალიან სერიოზული და საგანგაშოა, - ამის შესახებ ოკუპირებული აფხაზეთის ე.წ. ჯანდაცვის მინისტრმა ედუარდ ბუტბამ „მთავრობის სხდომაზე" განაცხადა. მან მოსახლეობას კორონავირუსის გამო დაწესებული ზომების დაცვისკენ მოუწოდა.

მისი თქმით, პაციენტებში ჟანგბადის მოხმარება იზრდება, რუსეთში კი ჟანგბადის შოვნა სულ უფრო რთულდება.

"ჩვენი მოსახლეობა უნდა დაგვეხმაროს. ექიმებიც ხალხი არიან, ისინიც დაიღალნენ. პაციენტებში ჟანგბადის მოხმარება იზრდება, სამედიცინო დაწესებულებაში დღეში 200-ზე მეტი ბალონი იხარჯება და რუსეთში ჟანგბადის შოვნა სულ უფრო და უფრო რთულდება“, - აღნიშნა ედუარდ ბუტბამ. მან სოხუმში მდებარე ჟანგბადის სადგურის რეაბილიტაციის აუცილებლობაზე ისაუბრა.

ამასთან, ე.წ. პრემიერ-მინისტრმა ალექსანდრე ანქვაბმაც დაადასტურა, რომ დაწესებულების განახლების საკითხი აქტუალურია, წინააღმდეგ შემთხვევაში კი, მისი თქმით, „კატასტროფის თავიდან აცილება შეუძლებელია“.