"ჩემი სახელი და გვარი სხვა ადამიანის ხმაზეა დადებული..." - რას ამბობს ალექსანდრე მილორავა სუს-ის გავრცელებულ აუდიოჩანაწერზე?
სუს-ი ცდილობს, რომ ჩვენ არეულობის ორგანიზება მოგვაწეროს, თითქოს ამას ვგეგმავდით, რაც სიმართლეს არ შეესაბამება, - ამის შესახებ სამოქალაქო აქტივისტმა ალექსანდრე მილორავამ ჟურნალისტებს განუცხადა. იგი სუს-ის მიერ გავრცელებულ ჩანაწერებს გამოეხმაურა და აღნიშნა, რომ ჩანაწერებში იგი არ ფიგურირებს და მის სახელ-გვარს იყენებენ.
„არანაირ გადატრიალების მცდელობას ადგილი არ ჰქონია, აქედან გამომდინარე, ჩემთვის სასაცილოა. მივმართავ, რომ ან ტექნოლოგიები გააუმჯობესონ ან კომპეტენცია და ის ხმა დაადონ ჩემს სახელ და გვარს, რომელიც რეალურად ჩემია. აქედან გამომდინარე, სერიოზული კომენტარის გაკეთებას არ ვაპირებ.
ჩემს მეგობრებთან ერთად ყოველთვის განვიხილავ ხერხებს, როგორ შეიძლება გავათავისუფლოთ მიხეილ სააკაშვილი, მაგრამ მხოლოდ და მხოლოდ კონსტიტუციურ ჭრილში, შესაბამისად არახალია, რომ არ გვსურს გლდანის ციხეში მიხეილ სააკაშვილის გადაყვანა, ამ პოზიციას ღიად ვაფიქსირებთ. რასაც სუს-ი ცდილობს მოგვაწეროს, რომ ჩვენ არეულობას ვგეგმავთ, თითქოსდა ვგეგმავდით ციხეში შეჭრას, ეს არ შეესაბამება სიმართლეს. ჩემი სახელი და გვარი სხვა ადამიანის ხმაზე არის დადებული, არ ვიცი ის ადამიანი ვინ არის. ყველა მიხვდება, რომ მე არ ვარ", - აცხადებს მილორავა.