რას წარმოადგენს მონოკლონური ანტისხეულები, რაც გერმანიამ საქართველოს კორონავირუსთან ბრძოლისთვის გადასცა?
გერმანიის ფედერაციული რესპუბლიკის მთავრობამ საქართველოს მონოკლონური ანტისხეულები გადასცა, - ამის შესახებ ინფორმაცია საქართველოს ჯანდაცვის სამინისტრომ გაავრცელა.
მათივე ინფორმაციით, დონაცია 3000 დოზაზე მეტი კასირივიმაბისა და იმდევიმაბისგან შედგება. მონოკლონური ანტისხეულების გამოყენება კოვიდ-19-ით ინფიცირებული, ჰოსპიტალიზებული პაციენტების სამკურნალოდ მოხდება.
ჯანდაცვის მინისტრის ეკატერინე ტიკარაძის განცხადებით, პაციენტებისთვის მონოკლონურ ანტისხეულების მიღების პროტოკოლი უკვე მზად არის.
"საქართველოს, გერმანიის მთავრობის მხრიდან, გადმოეცა მონოკლონური ანტისხეულები, რომელიც ძალიან მნიშვნელოვანი არის ჩვენი პაციენტების მკურნალობისთვის, დიდი მადლობა მინდა გადავუხადო ამისთვის ელჩს, რომელიც აქტიურად იყო ჩართული მოლაპარაკებებში. საქართველოში უკვე მზად არის პროტოკოლი, რის მიხედვითაც ჩვენი პაციენტები მიიღებენ მონოკლონურ ანტისხეულებს და დარწმუნებული ვარ, რომ ეს მნიშვნელოვნად გააუმჯობესებს მკურნალობის ხარისხს“, - აღნიშნა ტიკარაძემ.
ჯანდაცვის სამინისტროს ინფორმაციით, მონოკლონური ანტისხეულების საქართველოსთვის გადმოცემა გერმანიის საელჩოს აქტიური მხარდაჭერით განხორციელდა.
"მოხარული ვარ, რომ ჩვენ ქართველ პარტნიორებს გადავეცით მაღალი ხარისხის მედიკამენტის 3000 დოზა, ეს არის გერმანიისა და საქართველოს მთავრობას შორის წარმატებული თანამშრომლობის შედეგი. აღნიშნული მედიკამენტი განკუთვნილია კორონავირუსით ინფიცირებული იმ პაციენტებისთვის, სადაც დაავადება რთულ ფორმებში მიმდინარეობს. აქვე მინდა აღვნიშნო, რომ პანდემიასთან ბრძოლის ერთ-ერთი მთავარი იარაღი არის ვაქცინაცია, იმისათვის რომ ადამიანები არ დაავადდნენ საჭიროა რაც შეიძლება მეტი პირი აიცრას. ვაქცინაცია მნიშვნელოვანია, რათა პანდემია საქართველოში მომდევნო წელსაც არ გაგრძელდეს“, - აღნიშნა გერმანიის ელჩმა საქართველოში ჰუბერტ ქნირშმა.
- ცნობისთვის, მონოკლონური ანტისხეულები წარმოადგენს ჰიბრიდომების, იგივე ჰიბრიდული უჯრედების მიერ სინთეზირებულ ანტისხეულებს, რომელთაც მაღალი სპეციფიკურობა ახასიათებთ ანტიგენის მიმართ. მონოკლონური ანტისხეულები სხვადასხვა დაავადებების დროს გამოიყენება. სპეციალისტების თქმით, ეს არის ანტისხეული, რომელიც აბსოლუტური სიზუსტით უპირისპირდება სამიზნეს, ამ შემთხვევაში ვირუსს და ანადგურებს მას.
"მონოკლონური ანტისხეულები წარმოადგენს ლაბორატორიაში შექმნილ პროტეინს და პრაქტიკულად, ემსგავსება ორგანიზმში იმუნური სისტემის მიერ ბუნებრივად წარმოქმნილ სპეციფიკურ ანტისხეულებს, რომლებიც ებრძვიან ვირუსს ან სხვა გამომწვევს. COVID-19-ის საწინააღმდეგო მონოკლონური ანტისხეულები შექმნილია და ის ბლოკავს კორონავირუსის იმ ნაწილაკებს, რომლებიც ვირუსს უჯრედში შეჭრაში ეხმარება და შესაბამისად, იცავს ინფიცირებისგან. მონოკლონური ანტისხეულების ორგანიზმში შეყვანა განაპირობებს მოკლევადიან დაცვას (განსხვავებით ვაქცინისგან) და შესაძლოა COVID-19-ის პრევენციაში მნიშვნელოვანი როლი შეასრულონ... ისინი გართულებების რისკს ამცირებენ,“ - განმარტავს ambebi.ge - სთან ინფექციური პათოლოგიის, შიდსისა და კლინიკური იმუნოლოგიის ეპიდემიოლოგი, ნიუ-იორკის შტატის უნივერსიტეტის მაგისტრი ეკა ქარქაშაძე.
"საქართველოსთვის გადმოცემული კასირივიმაბი/იმდევიმაბი ფარმაცევტული კომპანია "როში“-ს მიერ არის წარმოებული. პრეპარატზე აშშ-ის საკვებისა და მედიკამენტების სააგენტოს (FDA) გაცემული აქვს გადაუდებელი გამოყენების ავტორიზაცია COVID-19-ით ინფიცირებული პაციენტების სამკურნალოდ. აღნიშნული მედიკამენტი ფართოდ გამოიყენება მსოფლიოში, მათ შორის ამერიკის შეერთებულ შტატებში, დიდ ბრიტანეთში, იაპონიაში, ევროკავშირის წევრ ქვეყნებში.
მედიკამენტები, დაავადებათა კონტროლისა და საზოგადოებრივი ჯანმრთელობის ეროვნულ ცენტრში განთავსდა. პრეპარატების გადმოცემის ცერემონიალს ჯანდაცვის მინისტრთან და გერმანიის ელჩთან ერთად, მინისტრის პირველი მოადგილე თამარ გაბუნია და დაავადებათა კონტროლის ცენტრის დირექტორი ამირან გამყრელიძეც ესწრებოდა“, - აღნიშნულია ჯანდაცვის სამინისტროს ინფორმაციაში.