"როცა დავბრუნდი, ზურა ცივად შემხვდა... მითხრა, რომ ქეთა უყვარდა" - რას ყვება ხათუნა ჟორდანია ზურა ხაჩიძისა და ქეთა თოფურიას სასიყვარულო ისტორიაზე?
"რუსთავი 2" -ს გადაცემა "ფარულ კონვერტში“, ია ფარულავას ამჯერად ხათუნა ჟორდანია ჰყავდა სტუმრად. მძიმე სენის დამარცხების შემდეგ, ხათუნა ხშირად სტუმრობს სხვადასხვა სატელევიზიო გადაცემებს და განვლილ ორ წელიწადზე საუბრობს, როდესაც მკურნალობის საკმაოდ რთული გზა გაიარა. ამჯერად ჟორდანიამ ტრადიცია დაარღვია და ცხოვრებაში პირველად ზურა ხაჩიძისა და ქეთა თოფურიას გახმაურებულ რომანზე ისაუბრა და ყველა იმ კითხვას გასცა პასუხი, რაც აქამდე მხოლოდ ჭორად გაეგო საზოგადოებას.
ხათუნა ჟორდანია:
"როდესაც ზურასთან დავიწყე სიარული, რატომღაც ამ ურთიერთობას ცოტა არასერიოზულად ვუყურებდი. გვიყვარდა ერთმანეთი, ვხვდებოდით, მაგრამ ის რომ ჩვენ შორის ასაკობრივი ზღვარი იყო, ეს ძალიან მოქმედებდა... ეს შეიძლება დღეს დიდად არაფერს ნიშნავს, მაგრამ მაშინ ნიშნავდა...
ვფიქრობდი, გვეყვარება ერთმანეთი სანამ გვეყვარება და მერე დავიშლებით-მეთქი. შვეიცარიაში წავედი სამი თვით და იქიდან რომ დავბრუნდი ზურა რაღაცნაირად ცივად შემხვდა, გული გაციებული ჰქონდა. დამიჯდა და მითხრა, რომ ბევრი იფიქრა ჩემს არყოფნაში, რომ ეს ურთიერთობა სერიოზული არ არის და მითხრა, რომ ქეთა თოფურია უყვარდა. ქეთა ამ დროს საქართველოში ცხოვრობდა.
წამოვედი და მახსოვს ძალიან ბევრი ვიტირე. უცებ მივხვდი, რომ ძალიან დამწყდა გული ჩვენს ურთიერთობაზე. იმ სამი თვის განმავლობაში, როდესაც შვეიცარიაში ვიყავი, ჩვენ არ გვქონია კონტაქტი.
ვფიქრობ, იმიტომ დამთავრდა მათი სიყვარულის ისტორია, რომ თვითონ ქეთამ გადაწყვიტა ზურასგან წასვლა. არ მგონია ამ საუბარზე ზურა გაბრაზდეს, ჩემს გარდა მის ცხოვრებაში კიდევ იყო დიდი სიყვარული.
ქეთა მაშინ ძალიან პატარა იყო, ეს მისი ბავშვური გატაცება იყო და მალე ისიც გამოჩნდა, რაც გამოჩნდა (მომღერალი ქეთა თოფურია მოსკოვში გადავიდა საცხოვრებლად, სადაც ჯგუფ "ა სტუდიოს“ სოლისტად მიიწვიეს - ავტ.). ქალი ვარ და ბევრი ქალი მომწონს ამ ქვეყანაზე, მაგრამ ისე როგორც ქეთა თოფურია მომწონს, არავინ. ძალიან ვაფასებ, რომ თავისი შრომით ამდენს მიაღწია. მერე რა, რომ ზურას შეყვარებული იყო. ძალიან ხშირად სწორედ ქეთა მომყავს ჩემ შვილებთან მაგალითად, თუ რას ნიშნავს შრომა და მიზანდასახულობა...
ეს სიყვარული ნამდვილად იყო ზურას ცხოვრებაში, თუმცა მგონია, რომ მათი ურთიერთობის დამთავრება ჩემს გამო არ მოხდა, ეს ქეთამ გადაწყვიტა.
არ მგონია, რომ ქეთას ეწყინოს ეს ამბავი რომ გავამხილე. იყო ეს ნამდვილად და მას შემდეგ უამრავმა წყალმა ჩაიარა. მე რამდენადაც ვიცი, ეს სიყვარული იყო ძალიან ლამაზი და ეს ერთ-ერთი მნიშვნელოვანი ეტაპი იყო ზურას ცხოვრებაში. ამას ვერც გავექცევი. ჩემამდე რა ჰქონდა ზურას, არ ვიცი, მაგრამ ქეთა იმიტომაც ვიცი, რომ ასეთი მაგარი გოგოა დღეს...“ - განაცხადა ხათუნა ჟორდანიამ.
ქეთა თოფურია 15 წლის იყო, როდესაც ზურა ხაჩიძე შეუყვარდა. წლების წინ ზურა ხაჩიძე ქეთა თოფურიასთან ურთიერთობას მედიაში ასე იხსენებდა:
"მე და ხათუნა ურთიერთობის დროს ბევრჯერ დავშორდით ერთმანეთს, არაერთხელ ვიჩხუბეთ. დაშორების შემდეგ მიყვარდა ქეთა თოფურია, მაგრამ რომ შევრიგდით, მალევე დავქორწინდით. მას მერე მოვდივართ ასე ლამაზად, ერთმანეთის სიყვარულით...“
წყვილი დაშორების შემდეგ მეგობრობას აგრძელებს. 2016 წელს, როდესაც ზურა ხაჩიძე საპარლამენტო არჩევნებზე "პატრიოტთა ალიანსის" მაჟორიტარობის კანდიდატი იყო ბორჯომსა და ასპინძაში, მის მხარდასაჭერად ქეთამ სპეციალური ვიდეომიმართვა ჩაწერა, სადაც რუსულად ამბობდა, რომ მისი ბავშვობის მეგობრისთვის მხარი დაეჭირათ.