"დღეს ჩვენი ეროვნული ფორმა, ჩოხა შებილწეს და გახდნენ რუსული აზროვნების "კაზაკები"- ჭყონდიდის ეპარქიიდან განკვეთილი ბერი
"დღეს ჩვენი ეროვნული ფორმა, ჩოხა, ეს ყველაფერი შებილწა ამ ხალხმა და გახდნენ "კაზაკები". რუსული აზროვნების "კაზაკები", - ამის შესახებ ჭყონდიდის ეპარქიიდან განკვეთილმა ბერმა, მამა ათინოგენემ ჟურნალისტებთან განაცხადა. მისი თქმით, "ჩამოსულმა ჩოხოსნებმა "მილიციის" დახმარებით იძულებით გამოიყვანეს მამაოები კელიებიდან".
"ეს ყველაფერი ჰგავს რუსულ იმპერიულ მოქმედებას. დღეს ეს ხალხი ჩვენს მონასტერში, სადაც მამები ცხოვრობდნენ, შევარდნენ და შემდეგ შეჰყვა "მილიცია". დღეს მამაოებს უყენებენ ბრალდებას, რომ ისინი პოლიციას არ დაემორჩილნენ, წარმოგიდგენიათ, შენ სადაც ცხოვრობ, სადაც კელია ააგე, შენი ნაშრომი რომ არის ყველაფერი, მოვა ჩოხოსანი და გეუბნება, წადი აქედანო და რის გამო? იმიტომ, რომ ვითხოვთ, მამათმავლობის ცოდვაში მხილებული ადამიანებისგან ეკლესიიდან გაწმენდას. არსად წასვლას არ ვაპირებ, არსად არ წავალთ. იმ ჩოხოსნებიდან არცერთი არ არის ადგილობრივი, მარტვილელი და ამ კუთხის შვილი. ჩამოყვანილი ადამიანები არიან. მეუფე სტეფანეს აქ არავინ უჭერს მხარეს. ერთი ადამიანი დამისახელეთ და მომიძებნეთ, რომელიც მას მხარს უჭერს და მის მოქმედებას იზიარებს.
დაკავებულია ექვსი პირი და საათნახევარი მამაოებთან ადვოკატი არ შეუშვეს", - განაცხადა მამა ათინოგენემ.
ადგილზე რჩება პოლიცია და მოქალაქეების ნაწილი. ჩაკეტილია სალხინოს მამათა მონასტრის შესასვლელი. ტაძრის ტერიტორიაზე არ უშვებენ მედიის წარმომადგენლებსაც. არსებული ინფორმაციით, ტაძარში იმყოფება ჭყონდიდის მიტროპოლიტი მეუფე სტეფანე.
შსს-ს ინფორმაციით, ჭყონდიდის ეპარქიაში მიმდინარე დაპირისპირებაში მონაწილე ორივე მხარის წარმომადგენლები და ინციდენტში მონაწილე პირები, ამ დროისთვის გამოკითხვის მიზნით პოლიციის განყოფილებაში არიან გადაყვანილი.
დღეს დილით, ტაძრიდან გამოაძევეს ეკლესიიდან განკვეთილი სასულიერო პირები.