"მიხეილ სააკაშვილი საკმაოდ სუსტად არის, სახეზე ეტყობა შეშუპება, უჭირს კომუნიკაცია" - რას ამბობს ადვოკატი ციხეში ექსპრეზიდენტის მონახულების შემდეგ
საქართველოს მესამე პრეზიდენტის, მიხეილ სააკაშვილის ადვოკატის შოთა თუთბერიძის განცხადებით, სააკაშვილი “შესამჩნევად დასუსტებულია და მას კომუნიკაცია უჭირს”.
როგორც ადვოკატმა რუსთავის მე-12 პენიტენციური დაწესებულებიდან გამოსვლის შემდეგ ჟურნალისტებს განუცხადა, ამ ეტაპზე სამედიცინო სფეროს წარმომადგენლების ჩართულობა კრიტიკულად მნიშვნელოვანია.
"პრეზიდენტმა გამოხატა ძალიან დიდი მადლიერება კათოლიკოს - პატრიარქის მიმართ, რომლის მიერ გუშინ გაცემული კურთხევის შემდეგ მეუფე ნიკოლოზმა მოინახულა პრეზიდენტი და გადასცა საჩუქარი - სამკერდე ჯვარი, აღსარება ჩაიბარა და აზიარა. ამისთვის პრეზიდენტი ძალიან მადლობელია.
რაც შეეხება ჯანმრთელობის მდგომარეობას, მიხეილ სააკაშვილი არის შესამჩნევად დასუსტებული. შესამჩნევია, რომ მას აღარ აქვს ენერგია, უჭირს კომუნიკაცია. ის ამ ეტაპისთვის, აღარ იღებს არცერთ იმ ნივთიერებას, რაც უზრუნველყოფდა მისთვის სიცოცხლისუნარიანობის შენარჩუნებას, რისი შედეგიც სახეზეა. ეტყობა შეშუპება სახეზე, საკმაოდ სუსტად არის. ვფიქრობ, სამედიცინო სფეროს წარმომადგენლების მონაწილეობა არის კრიტიკულად მნიშვნელოვანი”,- განაცხადა თუთბერიძემ.
რაც შეეხება სააკაშვილის კლინიკაში გადაყვანას, ადვოკატის ინფორმაციით, ამ საკითხზე როგორც სააკაშვილის, ისე მისი უფლებადამცველების პოზიცია უცვლელია.
"კლინიკაში გადაყვანაზე ჩვენი პოზიცია უცვლელია, სააკაშვილს დიდი ალბათობით დასჭირდება სამედიცინო დაწესებულებაში გადაყვანა. არსებობს მთავრობის მიერ ფორმირებული და ნდობაგამოცხადებული კონსილიუმის დასკვნა, რეკომენდაცია, თუ სად უნდა მოხდეს გადაყვანა. იუსტიციის სამინისტრო სულ ტყუილად ებრძვის „ქარის წისქვილებს“ და ითხოვს, რომ პრეზიდენტი გადაყვანილი იყოს დაწესებულებაში, რომელიც არ აკმაყოფილებს სტანდარტებს”,- განაცხადა შოთა თუთბერიძემ.