ავტორი:

"წინა ხელისუფლების დროს ჩემი ძმაც იჯდა ციხეში და სიცილის გამო ხალხს ცუდ დღეში აგდებდნენ, მაგრამ რაც გუშინ ვნახეთ შემაძრწუნებელია" - გიორგი სუხიტაშვილი

"წინა ხელისუფლების დროს ჩემი ძმაც იჯდა ციხეში და სიცილის გამო ხალხს ცუდ დღეში აგდებდნენ, მაგრამ რაც გუშინ ვნახეთ შემაძრწუნებელია" - გიორგი სუხიტაშვილი

მომღერალი გიორგი სუხიტაშვილი ფიქრობს, რომ პენიტენციური სამსახურის მიერ, მიხეილ სააკაშვილთან დაკავშირებით გავრცელებული კადრები შემაძრწუნებელია.

ის მიიჩნევს, რომ კადრების გავრცელების მიზანი საზოგადოების გაღიზიანება და დაპირისპირების პროვოცირება იყო.

"გუშინ რაც ვნახეთ, არაფერში არ წერია. ვინმეს თუ ილუზია შერჩა იმის, რომ ციხეში ახლა უკეთესი შეიძლება მოხდეს რამე, რაც წინა ხელისუფლების დროს ხდებოდა, არასწორია.

ვიცი რაც ხდებოდა წინა ხელისუფლების დროსაც იქ. ჩემი ძმაც იჯდა და ვიცი მისი მონაყოლით, სიცილის გამო შეიძლება ძალიან ცუდ დღეში ჩაეგდე. წარმოიდგინეთ, როდესაც იციან, რომ იქ კამერა არ არის, რას გიზამენ. ვინმე ამას დახურული სივრციდან გამოიტანს? ვინც უნდა გამოიტანოს, გამოიტანა და ვნახეთ 30-ჯერ გაჭრილი და დამონტაჟებული კადრები და ესეც კი შემაძრწუნებელი იყო. არ აქვს მნიშვნელობა ვინ იქნებოდა იქ, მიხეილ სააკაშვილი, გიორგი მარგველაშვილი თუ სხვა. არ აქვს მნიშვნელობა, იქ ვინ არის და რაზე ზის.

პირველ რიგში ეს ჩვენი შეურაცხყოფაა. ვის მოფხანეს გული გუშინდელი კადრებით? ვის გაუსწორეს? საქართველოში ეს არავის გაუსწორდა, "ქოცებსაც" კი. პირველი რეაქცია იყო აგრესია და ეს იყო მიზანი ალბათ, რომ აგრესია გამოეწვიათ ხალხის. ისედაც მაღალია ქვეყანაში ტემპერატურა და ამ დროს დებ ამას და რას ელოდები? უბრალოდ, პოლიტიკოსებს მეტი "სენსორები" აღმოაჩნდათ, იგრძნეს მოახლოებული საფრთხე და განმუხტეს სიტუაცია.

შეიძლება ჩემზეც თქვან ახლა, რომ ესეც სექტანტიაო. არა, ჩვენ ჩვენი ქვეყანა გვიყვარს. გავიხსენოთ როგორ მოვედით აქამდე - 2003 წელს ინგოროყვაზე სტუდია იყო და იქიდან ჩამოვდიოდით მე და ჩემი მეგობარი და მახსოვს უშნო შარფი მეკეთა, დამხვდნენ ჩემი ტოლი ტიპები და მადებენ იარაღს. ეს ყველაფერი დღე ხდებოდა. მახსოვს ხალხი მოცვივდა და ესენი გაიქცნენ. ვთქვათ ესროლათ, დავმთავრდებოდი მე და ასე დასრულდა რამდენი ადამიანის სიცოცხლე.

2004 წელს ჩემს რეგიონში პატრულმა რომ გაიარა, ტირილი დავიწყეთ, იმედი მოგვეცა. 2007 წლის აქციაზეც ვიყავი, თეატრში გაზისგან გაგუდული იატაკზე ვიწექი.... 2010 წელს მე და ჩემი ძმა დაგვიჭირეს. კიდევ რამდენი რამ... ახლა 2021 წელია და ჩვენს ქვეყანაში, პრეზიდენტს "კორიდორებში" დაათრევენ ნახევრად შიშველს, ეს ერის სირცხვილია! ჩვენს ნერვებზე თამაშობენ", - ამბობს გიორგი სუხიტაშვილი "მთავარი არხის" ეთერში.