"სააკაშვილის მიმართ დამოკიდებულება არის სამართლიანი, მის ჯანმრთელობას და სიცოცხლეს საფრთხე არ ემუქრება" - გია ვოლსკი
"სააკაშვილის მიმართ დამოკიდებულება არის სამართლიანი, მის ჯანმრთელობას, მის სიცოცხლეს საფრთხე არ ემუქრება",- ამის შესახებ საქართველოს პარლამენტის პირველმა ვიცე-სპიკერმა გია ვოლსკიმ განაცხადა, რითაც უპასუხა მედიის კითხვას ოპოზიციის პროტესტის თაობაზე, რომელიც საქართველოს მესამე პრეზიდენტის მიხეილ სააკაშვილის სამოქალაქო კლინიკაში გადაყვანას უკავშირდება.
როგორც ვოლსკი აცხადებს, ოპოზიციის არსს დესტრუქცია წარმოადგენს, თუმცა უფლება აქვთ აკეთონ ის, რაც კონსტიტუციით აქვთ მინიჭებული.
"ოპოზიციის რესურსს ვერ გეტყვით, მაგრამ საქართველოს აქვს რესურსი, რომ განვითარდეს. დღესაც მიმდინარეობს ბაღების მშენებლობა, მოსავლის მოყვანა, ინფრასტრუქტურული პროექტები გრძელდება, იქმნება საწარმოები და სამუშაო ადგილები. სახელმწიფოს გეგმაში უამრავი სხვა პრობლემის დაძლევის ღონისძება გააჩნია. რასაკვირველია, დესტაბილიზაციის მსურველებს ვერანაირად ვერ ავუკრძალავთ გააკეთონ ის, რაც კონსტიტუციით აქვთ უფლება მინიჭებული.
რეალურად რა სჭირდება ქვეყანას, არის ის საკითხი, რომელიც მთავარ "პლანზე“ უნდა წამოვიდეს. სააკაშვილის მიმართ დამოკიდებულება არის სამართლიანი, მის ჯანმრთელობას, მის სიცოცხლეს საფრთხე არ ემუქრება. ამ მიზეზით აქციების გაკეთება არის ის, რაც ამ პოლიტიკური მოძრაობის, შიგნით დევს - ამ პოლიტიკური სუბიექტის არსი წარმოადგენს დესტრუქციას. აქედან გამომდინარე აქციები იქნება სააკაშვილის, არჩევნების თუ სხვა ნებისმიერი მიზეზით, როგორმე ხელისუფლება მოიპოვონ, მეორე საკითხია, რასაც საზოგადოება უნდა აფასებდეს“, - აღნიშნა ვოლსკიმ.