ავტორი:

"ხელისუფლება ჯიუტად აგრძელებს სააკაშვილის წამებას, მკვლელობას და ამას საზოგადოება უყურებს" - ლევან ბეჟაშვილი

"ხელისუფლება ჯიუტად აგრძელებს სააკაშვილის წამებას, მკვლელობას და ამას საზოგადოება უყურებს" - ლევან ბეჟაშვილი

"ხელისუფლება ჯიუტად აგრძელებს პოლიტიკური შურისძიების აქტს - მიხეილ სააკაშვილის მკვლელობას, წამებას და ამას საზოგადოება უყურებს - ჩვენი პროტესტი მზარდი იქნება" - ამის შესახებ ჟურნალისტებთან "ნაციონალური მოძრაობის" დეპუტატმა ლევან ბეჟაშვილმა განაცხადა, რომელიც საკანონმდებლო ორგანოში 8 დეპუტატთან ერთად შიმშილობს.

მისი თქმით, მიხეილ სააკაშვილს ხელისუფლება ურღვევს როგორც სიცოცხლის და ჯანმრთელობის, ასევე თავისუფალი სასამართლოს უფლებას.

"დეპუტატების პროტესტს მოჰყვება საზოგადოების სხვა წარმომადგენელთა პროტესტი, ქუჩაში, ტელევიზიებში ეს უკვე იგრძნობა და ხელისუფლებას მოუწევს ანგარიში გაუწიოს ხალხის ძალას, ჰუმანურობის, სამართლიანობის პრინციპს და კანონიერებას, რადგან სააკაშვილთან მიმართებით ყველა საკანონმდებლო მოთხოვნა დარღვეულია, როგორც პატიმრის, ასევე, როგორც პაციენტის, რასაც სხვებს უკეთებენ, მისთვის ყველაფერი დაბლოკილია. ამიტომ დარწმუნებული ვარ პროტესტი იქნება მზარდი.

ვხედავთ, ხელისუფლება მანიპულირებს, როცა სასამართლოში გადაყვანაზეა საუბარი, განზრახული აქვთ, რომ სააკაშვილი არ ასარგებლონ სამართლიანი სასამართლოს უფლებით და არც სამოქალაქო კლინიკაში არ გაჰყავთ,"- განაცხადა ბეჟაშვილმა.

შეგახსენებთ, რომ პარლამენტში შიმშილობა 14 ნოემბერს გამოაცხადეს ოპოზიციონერმა დეპუტატებმა: დავით კირკიტაძემ, აკაკი მინაშვილმა, თემურ ჯანაშიამ, ბაჩუკი ქარდავამ, ნიკა მაჭუტაძემ, გიორგი გოდაბრელიძემ, სულხან სიბაშვილმა, ლევან ბეჟაშვილმა, აბდულა ისმაილოვმა. მანამდე პარლამენტში შიმშილობა "დროას“ ლიდერმა, ელენე ხოშტარიამ დაიწყო, რომელიც პარლამენტში უკვე მე-14 დღეა შიმშილობს. გარდა პარლამენტის დეპუტატებისა, შიმშილობა გამოაცხადა "ნაციონალური მოძრაობის“ წევრმა გიორგი ბარამიძემ, რომელიც პარტიის ოფისში შიმშილობს. ყველა მოშიმშილე მიხეილ სააკაშვილის სამოქალაქო კლინიკაში გადაყვანას მოითხოვს.