"ეპიდემიის მაღალი გავრცელების ხელშემწყობია მობილობის ძალიან მაღალი მაჩვენებელი, თუნდაც მიმდინარე აქციების პროცესი" - თამარ გაბუნია
"ეპიდემიის მაღალი გავრცელების ხელშემწყობია მობილობის ძალიან მაღალი მაჩვენებელი, თუნდაც მიმდინარე აქციების პროცესი" - ამის შესახებ ჯანდაცვის მინისტრის მოადგილემ, თამარ გაბუნიამ საკოორდინაციო საბჭოს სხდომის დასრულებისას განაცხადა, სადაც ეპიდვითარება შეაფასა.
თამარ გაბუნიას ინფორმაციით, გარდაცვალების მაჩვენებელი ინფიცირების მაჩვენებლის კლებასთან ერთად შემცირდება. ამასთან, გარდაცვალების პროპორცია 1.4%-ის ფარგლებში რჩება.
"დღეს მთავარი არის ის, რომ როგორღაც მოვახერხოთ ეპიდემიის გავრცელების შეკავება. ბუნებრივია, ეპიდემიის ამგვარი მაღალი გავრცელების ხელშემწყობი მობილობის ძალიან მაღალი მაჩვენებელია, თუნდაც მიმდინარე აქციების პროცესი, ყველას გვესმის, რომ ამას ხელს უწყობს.
ძალიან საყურადღებოა დღევანდელ პირობებში ამ მიმართულებითაც ვიფიქროთ, ვაქცინაციის პროგრამა რაც შეიძლება გააქტიურდეს. ის ინტერვალი, რაც არის დაწესებული აცრებს შორის, დავიცვათ. მოქალაქეების აქტიურობა მნიშვნელოვანია“, - აღნიშნავს გაბუნია.
ჯანდაცვის მინისტრის მოადგილემ ვაქცინაციის ტემპზეც გააკეთა აქცენტი. მისი თქმით, ბოლო პერიოდის განმავლობაში ვაქცინაცის ტემპმა მოიმატა, რაც იმედისმომცემია. როგორც მან საკოორდინაციო საბჭოს სხდომის დასრულების შემდეგ აღნიშნა, საწოლფონდი ისევ მაქსიმალურ დონეზეა მობილიზებული.
"8871 საწოლია მობილიზებული. კლინიკაში იმყოფება 6718 პაციენტი, აქედან 1766 ინტენსიური თერაპიის განყოფილებაშია, 371 პაციენტი არის რეანიმაციულ განყოფილებაში. 8 ნოემბრიდან ვაქცინაცის პროგრამის ფარგლებში ამოქმედდა 60 წლის ზემოთ პირთა ფინანსური წახალისების სქემა, ამან სტიმული მისცა ამ ასაკობრივ ჯგუფში ვაქცინაციის პროგრამის გაფართოებას.
აცრილთა შორის სტრუქტურულად 28%-დან 44%-მდე გაიზარდა 60 წლის ზემოთ ასაკობრივ ჯფგუფში პირთა რიცხვი. ვაქციინაციის გუშინდელი მაჩვენებელი 8 ათასს აჭარბებს, რაც იმედისმომცემია და ვფიქრობთ, კიდევ უფრო მეტი მატება არის მოსალოდნელი. ასე მიმდინარეობს "ბუსტერ“ პოზების ადმინისტრირება ნებისმიერ ასაკობრივ ჯგუფში. "ბუსტერ“ დოზების განსაკუთრებით მაღალი გამოყენება არის 18-დან 49 წლის ასაკობრივ ჯგუფებში. რაც შეეხება 12-დან 15 წლის ასაკის ბავშვების ვაქცინაციას, 643 დოზის ადმინისტრირება მოხდა. 16-დან 18 წლამდე აცრილია 11 ათასზე მეტი მოზარდი.
ამ მიმართულებით მუშაობა გრძელდება, ასევე ვმუშაობთ ახალი მედიკამენტების დანერგვაზე. მონოკლონური ანტისხეულები შემოვიდა ქვეყანაში გერმანიის მთავრობის დონაციით. ეს მედიკამენტები უკვე კლინიკებში განაწილდა. მათ აქვთ შესაძლებლობა, პაციენტს შესაბამისი ჩვენებით შესთავაზონ ეს მედიკამენტი, რომელსაც აქვს მაღალი ეფექტურობა“, - განაცხადა გაბუნიამ.