ვარსკვლავთცვენა და უჩვეულო სამოსი - ფოტოები House Of Gucci- ს პრემიერიდან
ნიუ იორკში რიდლი სკოტის ახალი ფილმის, House Of Gucci-ს პრემიერა გაიმართა. ფილმი ცნობილი დიზაინერის, მაურიციო გუჩის ცხოვრებასა და მკვლელობაზე მოგვითხრობს. მსახიობები წითელ ხალიჩაზე გლამურული სამოსით წარსდგნენ და საზოგადოებაზე დაუვიწყარი შთაბეჭდილება მოახდინეს.
რიდლი სკოტის House Of Gucci-ში როლის იდეალურად შესასრულებლად ლედი გაგა იტალიურ აქცენტზეც მუშაობდა - "მე მსურდა პატრიცია რეჯიანი ნამდვილ ადამიანად მექცია და არ ყოფილიყო ის კარიკატურული.“
- თავად რეჯიანი, რომელმაც ცნობილი დიზაინერისა და თავისი მეუღლის, მაურიციო გუჩის მკვლელობისთვის საკანში 18 წელი დაჰყო, უკმაყოფილოა იმით, რომ ფილმში მას ლედი გაგა ასახიერებს. "მას არც კი უცდია ჩემთან შეხვედრა. ფილმისგან არანაირი მატერიალური ინტერესი არ მაქვს, მე არანაირი შემოსავალი არ მერგება, ეს მხოლოდ პატივისცემის საკითხია“.
გაგამ მას Vogue-სთან ინტერვიუში უპასუხა, რომ სურდა ჟურნალისტური ცნობისმოყვარეობით მისდგომოდა პერსონაჟს და ფილმის სიუჟეტიდან გამომდინარე, თავად ამოეკითხა მისი ხასიათი - "არავინ მეტყოდა ვინ იყო პატრიცია გუჩი, თავად პატრიციაც კი.“
ფილმის პრემიერას ჰოლივუდის ვარსკვლავები დაესწრნენ. დაათვალიერეთ ფოტოები პომპეზური საღამოდან:
- რიდლი სკოტის ახალი ფილმი, რომელიც მოგვითხრობს ისტორიას ცნობილი დიზაინერის მკვლელობაზე, გლამურსა და სიხარბეზე, კინოთეატრებში 24 ნოემბრიდან გავა.
მოამზადა ანა სიბოშვილმა