ჩრდილოეთ კორეაში "კალმარის თამაშების" ჩანაწერის შეტანისთვის პირს სიკვდილით დასჯიან - როგორ სჯის მოზარდებს რეჟიმი სერიალის ყურების გამო
ჩრდილოეთ კორეელ მამაკაცს, რომელმაც "ნეტფლიქსის" პოპულარული სერიალის, "კალმარის თამაშების“ ვიდეო ასლები გაყიდა, სასიკვდილო განაჩენი გამოუტანეს. "დამნაშავე" მას შემდეგ დააკავეს, რაც გაირკვა, რომ ჩრდილოეთ კორეელმა 7-მა მოსწავლემ საიდუმლოდ შეიძინა სერიალის ჩანაწერი და უყურა.
ეს ინფორმაცია, მთავრობის მეთვალყურეობის სამსახურში უცნობი წყაროსგან შევიდა. როგორც გაირკვა, სერიალის ვიდეო ასლი ჩრდ. კორეაში ჩინეთიდან მეხსიერების ბარათით შეიტანეს და ის ერთ-ერთ მოსწავლეს მიჰყიდეს, რომელმაც შემდგომ სამეგობრო წრეში გაავრცელა.
- მას შემდეგ, რაც ამ ამბავმა ჩრდილოეთ კორეის მთავრობის ყურამდე მიაღწია, "კონტრაბანდისტს“ სიკვდილით დასჯის განაჩენი გამოუტანეს. არც სკოლის მოსწავლეები დაინდეს: არასრულწლოვანს, რომელმაც "კალმარის თამაშების“ ვიდეოს ასლი შეიძინა, სამუდამო პატიმრობა მიუსაჯეს, ხოლო დანარჩენ მოსწავლეებს, რომლებმაც ტელესერიალი ნახეს, 5-წლიანი მძიმე შრომა მიესაჯათ.
დაისაჯნენ ასევე სკოლის დირექტორი, მასწავლებლები და სკოლის ადმინისტრაცია: ისინი არა მხოლოდ გაათავისუფლეს სამსახურიდან, პარტიიდანაც გარიცხეს და დიდი ალბათობით, მათ ნახშირის მაღაროში სამუშაოდ გაამწესებენ, ან სოფლებში გადაასახლებენ.
მოამზადა ანა სიბოშვილმა