ავტორი:

"12 წლის ვიყავი, მაიკომ ეს სიმღერა რომ დამიწერა და საკმაოდ ძვირი, 5000 დოლარი გადავუხადეთ" - ნუცა ბუზალაძე ამერიკიდან მაიკო კაჭკაჭიშვილს პასუხობს

"12 წლის ვიყავი, მაიკომ ეს სიმღერა რომ დამიწერა და საკმაოდ ძვირი, 5000 დოლარი გადავუხადეთ" - ნუცა ბუზალაძე ამერიკიდან მაიკო კაჭკაჭიშვილს პასუხობს

კომპოზიტორი და მომღერალი მაიკო კაჭკაჭიშვილი ორი დღის წინ კიდევ ერთხელ მოექცა ყურადღების ცენტრში. მაიკომ ღიად ისაუბრა შოუბიზნესში არსებულ პრობლემებზე, მომღერალებსა და სიმღერის ავტორებს შორის ურთიერთობებზე, ასევე იმ უკმაყოფილებაზეც რაც ამ ურთიერთობებს რიგ შემთხვევებში მოყვება ხოლმე. კერძოდ, ამბობდა, რომ მომღერლებს "უჭირთ" იმ კომპოზიტორების სახელის ხსენება, ვისმა სიმღერებმაც ისინი პოპულარული გახადათ.

"დაფიცებული მაქვს ცხოვრებაში, არავის სიმღერას აღარ დავუწერ. თავიდანვე ყველაზე კარგად შემეძლო სიმღერა, მაგრამ 200 კილომდე ვიყავი და ვფიქრობდი, სცენას არ მოვუხდებოდი და სხვებს გადავულოცე....

ნუცა ბუზალაძემ ჩემი სიმღერით მოიგო "იურმალა", აიღო პრიზად 70 ათასი დოლარი. პატარა იები ან ბანბანერკა ან რაფაელო არც გახსენებია, ასე რომ, ამაზე მაქვს საუბარი..." - ამბობდა ვიდეოში კომპოზიტორი.

ნუცა ბუზალაძე უკვე რამდენიმე თვეა ამერიკაში ცხოვრობს და ჰოლივუდის დაპყრობას გეგმავს. მომღერალი შტატებში შემოქმედებითი კარიერის აწყობას აპირებს.

AMBEBI.GE-ს ჯერ კიდევ რამდენიმე დღის წინ გვქონდა კომენტარის ჩაწერის მცდელობა. მომღერალი ჩვენს წერილს მოკლე გამოეხმაურა.

ნუცა ბუზალაძე:

- დიახ, გავაკეთებ ამ თემაზე კომენტარს. 12 წლის ვიყავი მაიკომ ეს სიმღერა რომ დამიწერა და 5000 დოლარი გადავუხადეთ ყველაფერში, ტექსტი, სიმღერა და არანჟირება. "იურმალა" კი 17 წლის ასაკში მოვიგე. ამ სიმღერაში ფული გადავიხადე და სხვათაშორის თავის დროზე საკმაოდ ძვირი.

12 წლის რომ ვიყავი, მაშინ არავინ მიცნობდა და ჩვეულებრივ ვიყიდეთ ეს სიმღერა. რაც შეეხება კითხვას, აქამდე მაიკოსთვის წყენა თუ შემიმჩნევია, გეტყვით, რომ არასოდეს...

პირველი ლაივიდან მეორე დღეს, მაიკო კაჭკაჭიშვილმა კიდევ ერთი სტატუსი გამოაქვეყნა:

"ჩემი „ლაივები“ ავიღე ისედაც ვთქვი ლაივში ალბათ წავშლი-თქო. ეს იმიტომ არა, რომ ჩემი სიტყვები უკან წავიღე, არა, მაგალითად, ქრისტინე იმედაძეს ეწყინა, მგონი, არადა ქრისტინე მეგობარია და მადლობაც იცის და მადლობაზე მეტიც...

მე ზოგადად ვსაუბრობდი 2000 წლიდან სულ იყო ეს პრობლემა და მინდა რომ აღარ იყოს. სიმღერაში თუ ჰონორარი გადაიხადე ეგ არ ნიშნავს რომ შენია, ჰონორარი ერთჯერადი ჯამაგირია.

სიმღერას კიდევ მრავალგზის წარმატება მოაქვს და ამის დაფასება მინდა ისწავლონ მეტი არაფერი, წარმატებები ყველას...“ - წერს მაიკო კაჭკაჭიშვილი.