"მოწყენილი კიანუს" ფოტოს რეალური ამბავი 11 წლის შემდეგ - "უბრალოდ, სენდვიჩს ვჭამდი... მშიოდა"

კიანუ რივზმა 11 წლის შემდეგ, ორშაბათის "The Late Show”-ში სტუმრობისას, "მოწყენილი კიანუს“ ფოტოს მიღმა არსებულ რეალობას ფარდა ახადა.

"მატრიცას“ 57 წლის ვარსკვლავი, 2010 წელს ინტერნეტსენსაციად იქცა პარკში, სკამზე გადაღებული ფოტოს გამო, რომელზეც მოწყენილი მიირთმევს საჭმელს.

"უბრალოდ, სენდვიჩს ვჭამდი!“ - მიუგო წამყვანს კიანუმ ფოტოს თაობაზე დასმული კითხვაზე პასუხად..

"ანუ "მოწყენილი კიანუს“ ფოტოზე, რეალურად არ ხარ მოწყენილი?“ - შეუბრუნა კითხვა სტივენ კოლბერტმა, რაზეც კიანუმ თქვა, რომ ბევრი რამ უტრიალებდა თავში და უბრალოდ, ჩაფიქრებული იყო: "რაღაც პრობლემა მქონდა. მშიოდა".

სტივენ კოლბერტმა კიანუს ეს ფოტო მისავე კომიქსების წიგნის "BRZRKR”-ის ერთ-ერთ ილუსტრაციას შეადარა და ჰკითხა, ამ ნახატის ავტორისთვის, თვითონ ხომ არ იყო ინსპირაცია. კიანუ რივზმა კი ილუსტრატორის საქციელი ასე შეაფასა:" არ მეგონა რონ გარნი (ილუსტრაციების ავტორი) ამას თუ იზამდა, მაგრამ, როგორც ჩანს, ზუსტად ასე მოიქცა. ჩემი აზრით, ძალიან მაგარია!“ - თქვა მან.

"The Matrix Resurrections“ კიანუს მონაწილეობით უკვე კინოთეატრებშია. მსახიობი უახლოეს მომავალში საკუთარი კომიქსის წიგნის მიხედვით, Netflix-ის სერიების გადაღებასაც კი აპირებს.

წყარო

მოამზადა ანა სიბოშვილმა