"ბერლინში დააკავეს საქართველოს გენშტაბის ყოფილი უფროსი გიგი კალანდაძე... ხელისუფლება რუსეთის მთავარ მტრებს უქმნის პრობლემებს" - რას წერს მიხეილ სააკაშვილი

ბერლინში საქართველოს გენშტაბის ყოფილი უფროსი, გიორგი კალანდაძე დააკავეს. აღნიშნულის შესახებ საქართველოს ექსპრეზიდენტი, მიხეილ სააკაშვილი "ფეისბუქის" ოფიციალურ გვერდზე ეხმიანება.

"საქართველოს ხელისუფლების მოთხოვნით, ბერლინში დააკავეს საქართველოს გენშტაბის ყოფილი უფროსი გიგი კალანდაძე. ის არის 2008 წლის ომის გმირი. მაშინ მე-4 ბრიგადის ჯგუფმა, რომელსაც ის მეთაურობდა, შეაჩერა რუსეთის ტანკების მოწინავე დამრტყმელი ძალა და ამ ბრძოლის დროს მძიმედ დაიჭრა რუსეთის 58-ე არმიის მეთაური გენერალი ხრულოვი. უკრაინაში ომის დაწყებისთანავე გიგი აქტიურად ჩაერთო საბრძოლო მოქმედებებში.

მას მნიშვნელოვანი წვლილი აქვს გაღებული მტრის შეტევის შეჩერებაში აღმოსავლეთის ფრონტზე. სწორედ ამის მერე საქმეც აღიძრა. რამდენადაც ვიცი, გენერალი კალანდაძე უკრაინის მოქალაქეა და ასევე, მას უკავია თანამდებობა უკრაინის ეროვნულ გვარდიაში.სირცხვილია, რომ საქართველოს ხელისუფლება სწორედ რუსეთის მთავარ მტრებს უქმნის პრობლემებს მსოფლიოს მასშტაბით.

დარწმუნებული ვარ, გერმანიის პროკურატურა და სასამართლო სწრაფად გაერკვევიან დაკავების მოთხოვნის დაუსაბუთებლობაში და გიგი ძალიან სწრაფად გათავისუფლდება და მას ბოდიშსაც მოუხდიან. გერმანიის სასამართლო მურუსიძის კანტორა არავის ეგონოს. უბრალოდ, საქართველოს ხელისუფლება მორიგ ჯერზე იჭრის თავს!" - წერს სააკაშვილი.

გაერთიანებული შტაბის ყოფილი უფროსი, გიორგი კალანდაძე დააკავეს. არსებული ინფორმაციით, მისი დაკავება გერმანიაში საქართველოს ხელისუფლების მოთხოვნით მოხდა. სხვა დეტალები უცნობია. "ინტერპრესნიუსი" დეტალებს საქართველოს შს სამინისტროში არკვევს.