ორსული ცოლის განსაკუთრებული სისასტიკით მკვლელობაში ბრალდებულს ფსიქიატრიული ექსპერტიზა ჩაუტარდება
ორსული ცოლის, ქეთა კეპულაძის განსაკუთრებული სისასტიკით მკვლელობაში ბრალდებულ გოგა გზირიშვილს ფსიქიატრიული ექსპერტიზა ჩაუტარდება.
პროკურატურამ შესაბამისი სასამართლო სამედიცინო ექსპერტიზა გუშინ დანიშნა. აღნიშნული ექსპერტიზის დასკვნით უნდა დადგინდეს, როგორი იყო გოგა გზირიშვილის ფსიქიკური მდგომარეობა როგორც მკვლელობის ჩადენის მომენტში, ასევე როგორია ის ახლა.
ცნობისთვის, გამოძიების ინფორმაციით, 22 დეკემბერს, თბილისში, ბრალდებულმა გოგა გზირიშვილმა განზრახ მოკვლის მიზნით, დანით ორსულ მეუღლეს - ქეთა კეპულაძეს განსაკუთრებული სისასტიკით, სხეულის სხვადასხვა არეში ოცდაათამდე ჭრილობა მიაყენა.
მიყენებული დაზიანებების შედეგად ორსული კეპულაძე შემთხვევის ადგილზე გარდაიცვალა. გზირიშვილს ბრალდება საქართველოს სისხლის სამართლის კოდექსის 111,109-ე მუხლის მე-2 ნაწილის „ა“ და „ვ“ ქვეპუნქტებით და მესამე ნაწილის „ბ“ ქვეპუნქტით (განზრახ მკვლელობა, დამნაშავისთვის წინასწარი შეცნობით ორსული ქალის, ოჯახის წევრის მიმართ, ჩადენილი განსაკუთრებული სისასტიკით) წარედგინა, რაც სასჯელის სახედ და ზომად 16 წლიდან 20 წლამდე ან უვადო თავისუფლების აღკვეთას ითვალისწინებს. გოგა გზირიშვილი წარდგენილ ბრალდებას აღიარებს და აცხადებს, რომ მკვლელობა მან ჩაიდინა.