ემანუელ მაკრონი არავაქცინირებულებს  "ცხოვრების გართულებას" ჰპირდება - რა პოლიტიკის გატარებას გეგმავს საფრანგეთი აცრების წასახალისებლად

საფრანგეთის პრეზიდენტი ემანუელ მაკრონი არავაქცინირებულ ადამიანების აფრთხილებს და ამბობს, რომ აუცრელ ადამიანებს "ცხოვრებას გაურთულებს."

"მინდა, რომ დისკომფორტი შევუქმნა მათ და ჩვენ ამის კეთებას განვაგრძობთ ბოლომდე“, -აღნიშნა პრეზიდენტმა ფრანგულ გამოცემა Le Parisien-თან ინტერვიუში.

მისი თქმით, მიუხედავად იმისა, რომ ვაქცინაციას არავის დააძალებს, სურს აცრების პროცესი ყოველდღიური აქტივობების შეზღუდვის ხარჯზე წაახალისოს.

"არავაქცინირებულ ადამიანებს საპყრობილეში არ გავგზავნით. თუმცა, მათ უნდა ვუთხრათ, რომ 15 იანვრიდან რესტორანში წასვლას ვეღარ შეძლებენ, ვერც ყავის დასალევად წავლენ, ვერ წავლენ კინოში და თეატრში“, - აღნიშნა პრეზიდენტმა.

პოლიტიკური ოპონენტების შეფასებით, უხეში ენა, რომელიც ემანუელ მაკრონმა გამოიყენა პრეზიდენტის შესაფერისი არ იყო. პრეზიდენტის კომენტარი პარლამენტში ოპოზიციური პარტიების წარმომადგენლების მიერ კოვიდ საშვებთან დაკავშირებული კანონპროექტის გადადებას მოჰყვა.

კანონპროექტის მიხედვით, არავაქცინირებული ადამიანებისთვის უამრავი აქტივობა უნდა შეზღუდულიყო. მისი დამტკიცება კენჭისყრით ამ კვირაში იგეგმებოდა, თუმცა აღნიშნულმა ინიციატივამ ვაქცინაციის მოწინააღმდეგეებში უკმაყოფილება გამოიწვია. გარდა ამისა, რამდენიმე ფრანგმა პარლამენტარმა აღნიშნა, რომ მათ ამ საკითხთან დაკავშირებით სიკვდილის მუქარის შემცველი შეტყობინებები მიიღეს.